Пишува: ЗОРАН ИВАНОВ
Свесно или несвесно, како слободен и самоуверен министер или пак партиски притиснат, министерот на полицијата, Панче Тошковски, првиот човек со заклетва да не` штити од криминал, денеска пред новинарите и јавноста промовираше став со поддршка за криминал.
На аферата „Данела, Висар, Дивоградба, Чаир, Фалсификат, Корупција“ или како се јавноста или, доколку оформат предмет, ќе ја именуваат правосудната институција, е малку важно.
Важното е, ако и тоа веќе може да се нарекува важно, што денеска првиот полицаец Панче Тошковски од новинарите запрашан што ќе преземе неговото министерство за чаирската дивоградба шесткатница на земја државна, нека впечатокот е субјективен, видно возбуден и напнат поради жешкото новинарско прашање, одговори, парафразирам:
„Да го пријавеше ова градоначалничката пред две три години, на почетокот на нејзиниот мандат, па тогаш јавноста и да и поверуваше во искреноста. Вака, вака ова е само предизборна реторика“.
Си го кажа Панче тоа и човек да не поверува дека ова е јавниот став на високиот државен функционер кој, согласно својата висока државна позиција, треба да гони криминали, а не да штити криминали.
Актуелниот министер на полицијата, доколку е сосема свесен што кажа, со оваа своја изјава, практично застана на страната на корупцијата и го поддржа криминалот.
Од една страна партијата му се колне дека ќе расчистува со корупции, од друга страна нејзиниот министер застанува во заштита на една актуелна корупција. Тошковски, аферата за еден конкретен и актуелен криминал, од правните последици за извршителите, се обиде да ја прешалтува во политичките амбиции на Данела.
Но темата не е Данела и нејзините јавни или скриени намери.
Таа, нивниот избор Данела, може да е градоначалничка секаква и никаква и да е градоначалничка способна или неспособна за што одговорите ги даваат и ќе ги дадат граѓаните гласачи.
Во оваа афера корупциска, поентата воопшто не е во нејзините евентуални политички амбиции.
Или во некои нејзини политички манипулации во пресрет на локалните избори, а во функција на некои и некакви партиски конкуренти на што во изјавата алудира министерот Тошковски.
Туку во фактот кој би требало да биде примарен кај министерот. Во одговорот во кој тој игнорираше криминал при на очигледен криминал.
И не можно е, додека министерот во изјавата ја вртеше водата од правен на политички терен, да не знаеше, како што соопшти Јавното обвинителство, дека тоа веќе констатирало незаконска градба.
Дека во соопштението спомнува бесправна градба, дека никнала станбена зграда на шест ката и тоа лани и тоа на државно земјиште и тоа без никаква институционално правна процедура задолжителна дури и за граѓанин кој, доколку сака да изгради макар гаража за својот автомобил или да догради соба на својата семејна куќа, ќе мора да побара и да добие градски и општински согласности.
Е да, точно, целата држава ни врие од дивоградби, ако е тоа утехата.
Ама кога дивоградби аминуваат високи општински и уште повисоки државни функционери од народот избрани да се справуваат со корупции и со криминали, тогаш, тогаш …
Утре е нов ден па, па можеби Панче, по негова бесона ноќ поради таа негова несреќна партиска изјава, ќе каже или ќе напише извинување кое ќе содржи правна, антикорупциска и антикриминална содржина.
Ова, секако, само доколку совеста му надвладее над дневно партиските и над дневно коалициските потреби.
Но, ајде, утре е утре па …, па, како што вели министерот, „Со господ напред“!
