Американскиот претседател Доналд Трамп побара Белата куќа да истражи дали сојузниците на поранешниот претседател Џо Бајден го прикривале наводното влошување на неговите ментални способности и незаконски користеле уред за потпишување (autopen) во име на Бајден за потпишување документи.
Бајден, кој се бори со рак на простатата, одговори дека тој ги донесувал одлуките за време на неговото владеење и рече дека одлуката на Трамп има за цел да го одвлече вниманието на Американците од законот за намалување на даноците за богатите, кој Конгресот го разгледува.
Републиканскиот претседател Трамп одамна тврди дека Бајден, кандидатот на Демократската партија, кој во 2020 година го победи Трамп на претседателските избори, е ментално неподобен, а освен тоа изјави дека употребата на уред за автоматско потпишување документи, веројатно е неправилна практика и би можела да значи дека овие документи се неважечки.
Бајден ги отфрли обвинувањата.
– Да бидам јасен: јас ги донесував одлуките за време на моето владеење. Јас ги донесував одлуките за помилувањата, уредбите, законите и декларациите. Сите сугестии дека не сум го правел тоа се апсурдни и неточни, рече тој.
Тимот на Бајден рече дека употребата на уред за автоматско потпишување е утврдена законска практика, која се применува по одлука на претседателот.
Поранешниот претседател, кој сега има 82 години, минатата година се повлече од изборната трка, откако неговото лошо претставување на дебатите против Трамп ја зголеми загриженоста за неговата возраст и неговата подобност да владее уште четири години. Во ноември, Трамп ја победи поранешната потпретседателка Камала Харис.
Тимот на Бајден минатиот месец соопшти дека поранешниот претседател е дијагностициран со агресивна форма на рак на простатата.
Овој развој на настаните, како и новата книга во која се зборува за загриженоста на внатрешните лица од Демократската партија во врска со менталната остроумност на Бајден за време на неговата кампања, повторно го насочија вниманието кон здравјето на поранешниот претседател, пренесува БТА.
Додека беше на власт, сојузниците на Бајден ги отфрлаа тврдењата дека тој има ментални проблеми, но го признаваа фактот дека е во поодмината возраст.
По објавувањето на дијагнозата, Трамп му посака на Бајден брзо закрепнување, но сепак продолжи да го обвинува за предизвиците со кои се соочува земјата.
Трамп му нареди на својот правен советник во Белата куќа да провери дали „одредени лица ја доведувале во заблуда јавноста за менталната способност на Бајден и противуставно ја вршеле власта и овластувањата на претседателот“. За време на истрагата ќе бидат проверени документи потпишани со уред за автоматско потпишување, како и лица кои биле одговорни за користењето на уредот.
– Во последните месеци стануваше сè поочигледно дека сојузниците на поранешниот претседател Бајден ја злоупотребувале власта што ја имаат потписите на претседателот, преку употреба на уред за автоматско потпишување за прикривање на влошувањето на неговите когнитивни способности, пишува во неговиот документ.
Висок службеник од правниот оддел на Трамп во понеделникот рече дека од него е побарано да истражи дали Бајден бил способен и дали други луѓе го искористиле преку уредот за автоматско потпишување.
