Унијата за Медитеранот (UFM), организација што ги обединува 43 земји, предупреди дека за 25 години може да има повеќе пластика отколку риби во Средоземното Море доколку управувањето со отпадот не се подобри радикално.
„Средоземното Море е една од областите најзагадени со пластика во светот“, предупреди организацијата од своето седиште во Барселона по повод Светскиот ден на животната средина.
Медитеранот претставува помалку од 1 процент од површината на светските мориња, но е дом на речиси 20 проценти од сите познати морски видови – едно од најважните точки на морскиот биодиверзитет во светот. Исто така, тоа е дом на една од најголемите концентрации на загадување со морска пластика во светот, со околу 730 тони пластичен отпад што се испуштаат во морето секој ден, објави Унијата за Медитеранот.
„Доколку производството на пластика продолжи да расте со стапка од 4 проценти годишно и доколку управувањето со отпадот не се подобри радикално, испуштањето пластика во морето би можело да се удвои до 2040 година, а до 2050 година би можело да има дури и повеќе пластика отколку риба“, соопшти организацијата.
Загадувањето во Средоземното Море, предизвикано главно од комбинација на висока густина на крајбрежно население, масовен туризам и ограничена размена на вода во полузатворена морска структура, претставува многу сериозни еколошки, јавноздравствени и социоекономски ризици чии ефекти се уште се проучуваат.
„Обидите за борба против оваа критична ситуација со цел да се исполнат Целите за одржлив развој на ОН мора затоа да се фокусираат на промовирање политики за кружна економија кои ја минимизираат употребата на пластика и даваат приоритет на употребата на биоразградливи и потрајни алтернативи на пластика“, објави Унијата за Медитеранот.
Организацијата е основана пред 17 години, се залага за иницијативи за одржлива сина економија кои го промовираат социоекономскиот развој преку одговорно користење на морските ресурси. Синомедитеранското партнерство (BMP), фонд со повеќе донации промовиран од Унијата за Медитеранот, кој мобилизира инвестиции во проекти за одржлива сина економија во областите на Јужниот Медитеран и Црвеното Море, е водечка иницијатива во оваа област.
„Додека го одбележуваме Светскиот ден на животната средина, клучно е да се препознае дека растечкиот бран на пластичен отпад не е само еколошки проблем, туку и проблем што директно влијае на благосостојбата на нашите заедници и економии“, рече генералниот секретар на Унијата за Медитеранот, Насер Камел.
„Прекуграничните прашања, вклучително и загадувањето со пластика, бараат прекугранични решенија. Унијата за Медитеранот секогаш ќе ги поддржува иницијативите за регионална соработка што промовираат одржлив развој и го зачувуваат нашето драгоцено море за идните генерации“, заклучи тој.
