Во образовната инфраструктура има инвестиции од околу две милијарди денари, кои опфаќаат повеќе проекти, меѓу кои училишта, спортски сали, студентски домови,…, изјави денеска премиерот Христијан Мицкоски, одговарајќи на новинарско прашање во Битола во врска со она што Владата го прави за подобрување на инфраструктурата во образованието.
-Што се однесува до Министерството за образование имаме инвестиции околу две милијарди денари, седум комплетно нови училишта и 20 се реновираат, четири нови спортски сали, два студентски дома, дел од стратешкиот договор со Обединетото Кралство е изградба на нов медицински факултет во рамки на новиот Клинички центар во Штип, студентски дом со 2200 легла. Очекувам оваа година да продолжи изградбата на зградите на ФИНКИ и ФФК, при универзитетот свети „Кирил и Методиј“, како и почеток на изградбата на Комплексот на универзитетот „Мајка Тереза“, изјави Мицкоски, кој престојува во посета на Општина Битола, каде присуствува, меѓудругото и на почетокот на реконструкцијата на зградата на поранешното кино „Партизан“.
Мицкоски денеска во Битола ќе се обрати на одбележувањето на 35 години од формирањето на ВМРО-ДПМНЕ, на настан насловен „Идеја што не запира, вредности што носат промени“, а на прашањето каква порака ќе упати вечерва од Хераклеа истакна дека за партијата ова е голем настан.
-За нас ова е навистина посебен настан, сепак 35 години од постоењето на современото ВМРО, односно ВМРО-ДПМНЕ е голем настан. Со тоа што сме во Битола испраќаме силна порака и за Битола и за битолчани и за целиот Пелагонски регион. ВМРО-ДПМНЕ е најдржавната и најголемата политичка партија во Македонија, мора така да се однесуваме. И во периодот кој следи очекувам ВМРО-ДПМНЕ тоа да го повтори со уште една би рекол историски голема победа на локалните ибзори на целата територија во државата, вклучително и тука во Битлоа. Така што тоа би била пораката, истакна Мицкоски.
