Израелските одбранбени сили (ИДФ) објавија дека нападнале „погон за производство на центрифуги и неколку погони за производство на оружје“. Нападите беа извршени во последните неколку часа во главниот град Техеран, а според ИДФ, во нив учествувале 50 израелски борбени авиони.
Центрифугите се машини што се користат за збогатување на ураниум. Збогатениот ураниум може да се користи како гориво за нуклеарни централи, но и за производство на нуклеарни бомби. Израел тврди дека Иран се обидува да произведе нуклеарно оружје.
ИДФ додаде дека нападнале и бројни погони за производство на оружје и ракети. Меѓу нив, тврдат тие, бил и објект за производство на суровини и компоненти за ракети земја-земја и земја-воздух.
Во текот на ноќта, израелската воздушна одбрана пресретна повеќе ирански балистички ракети над Тел Авив. Засега нема информации за штети или жртви.
Израел изврши повеќекратни напади врз главниот град на Иран, Техеран, насочени кон Универзитетот Имам Хосеин, поврзан со Револуционерната гарда на Иран, во источен Техеран, според иранските новински веб-страници.
Во меѓувреме, платформата за комуникација WhatsApp изрази загриженост откако иранската државна телевизија ги повика граѓаните да ја избришат апликацијата заштитена со енкрипција, обвинувајќи ја дека собира кориснички податоци за да ги предаде на Израел. Обвинувањето е упатено без никакви конкретни докази.
-Загрижени сме дека овие лажни обвинувања би можеле да се искористат како изговор за блокирање на нашите услуги во време кога луѓето имаат најголема потреба од нив, се вели во соопштението на WhatsApp.
Компанијата додаде: „Ние не ја следиме вашата точна локација, не водиме евиденција за тоа со кого комуницирате и не ги следиме личните пораки што ги разменуваат корисниците. Ние не даваме збирни информации на ниту една влада.“
Додека Израел и Иран разменуваат оган во последните денови, американскиот претседател Доналд Трамп и врховниот лидер на Иран, ајатолахот Али Хамнеи, разменуваат пораки на социјалните медиуми.
Трамп објави на Truth Social дека САД имаат „целосна контрола врз воздушниот простор над Иран“. Тој, исто така, упати лична закана до Хамнеи: „Знаеме точно каде се крие таканаречениот „врховен лидер“. Тој е лесна цел, но е безбеден таму – нема да го отстраниме (да го убиеме!), барем не засега“. Трамп додаде дека „ни снемува трпение“ и ја заврши објавата со зборовите: „БЕЗУСЛОВНА КАПИТУЛАЦИЈА!“
Сепак, нема индикации од Техеран дека ова ќе се случи.
Во серија објави на „X“, Хамнеи рече дека Иран „никогаш нема да се помири со ционистите“. -Нема да покажеме милост кон ционистите, гласи преводот на една од објавите. Во друг, тој објави: „Битката започнува“.
Амбасадата на САД во Ерусалим, како што соопшти Стејт департментот, ќе биде затворена од денеска до петок поради безбедносната ситуација во регионот и во согласност со израелските упатства.
