МОН со стручните тела посветуваат многу внимание на инклузијата на учениците со посебни потреби, а резултатите стануваат видливи, рече министерката за образование и наука Весна Јаневска на панел-дискусијата по повод една година од мандатот на оваа Влада – „Ги градиме темелите на промените. За твоето време кое доаѓа!“
Соопшти дека конкурсот за образовни асистенти е отворен, а во врска со нивниот недостиг на почетокот на минатата учебна година, појасни дека децата со посебни потреби имаат различни потреби и оти не значи дека секое треба да има сопствен образовен асистент.
-Понекогаш е многу корисно да имаат сопствен образовен асистент, кој не е исто како личен асистент, но некогаш е подобро и самостојно да работат и затоа е предвидено образовниот асистент да работи со едно, две или со три дечиња. Немаме пропусти во спроведувањето, напротив, се трудиме што е можно подобро тоа да го направиме, рече Јаневска.
Посочи дека самите родители понекогаш имаат своја проценка што им е потребно на нивното дете наспроти она што е препорачано согласно Меѓународната класификација на функционирање, попреченост и здравје (МКФ).
-Постои еден притисок кој родителите го прават на МКФ, МОН и на училиштето за сопствена проценка за потребата од образовен асистент. Имаме и спротивни ситуации – каде што МКФ ќе предложи одредена процедура – колку дена да е детето во училиштето, колку да е во ресурсниот центар, па не се спроведува. Ова се многу комплексни и комплицирани процеси кои, за жал, во минатото беа сведени на целосна инклузија и целиот проблем беше сведен на родителот и на ученикот. Ученици кои не постигнуваат никаков успех, макар и само животни вештини – оти имаме и такви деца кои треба да добијат само животна вештина, а ние сме ги ставиле во училиште каде што треба да решаваат математички задачи или да пишуваат есеи, рече Јаневска.
Во врска со состојбата со несоодветен наставен кадар во средното училиште за ученици со оштетен слух „Партенија Зографски“ во Скопје , за кое Народниот правобранител во анализа констатираше дека само неколку наставници го знаат знаковниот јазик, Јаневска рече дека е запознаена со проблемот.
-Немаме стандардизиран знаковен јазик, но тоа не е пречка. Имаме многу малку наставници кои го знаат знаковниот јазик. Познат ни е проблемот, во предвид ни е да го решаваме. Ние може да ставиме во договор дека секој наставник од тоа училиште мора да го знае јазикот, но немаме таков кадар. Битно е дека знаеме и дека имаме план и ќе го спроведуваме. Не можам да гарантиран за времето зашто ова се процеси, бара време, но сигурна сум дека до крајот на мандатот и за ова ќе имаме решение, додаде Јаневска.
