Големата австралиска авиокомпанија „Квантас“ потврди утрово дека била изложена на кибер напад во кој „хакерите“ дошле до лични податоци на околу шест милиони нејзини клиенти, додавајќи дека системот во меѓувреме е ставен под контрола.
-Инцидентот се случил кога кибер криминалец се обидел да нападне кол-центар и пристапил до платформа за услуги на клиенти од трета страна. Нема влијание врз бизнисот или безбедноста на авиокомпанијата, се вели во соопштението на „Квантас“.
Австралиската компанија соопшти дека околу шест милиони клиенти имаат записи за услуги на платформата од трета страна, на која „Квантас“ забележал „необична активност“ во понеделникот.
-Продолжуваме да го истражуваме обемот на податоците што беа украдени, но очекуваме количината да биде значителна. Првичната анализа потврди дека податоците вклучуваат имиња на клиенти, е-адреси, телефонски броеви, датуми на раѓање и броеви на членство во програмата за лојалност, соопшти „Квантас“.
Компанијата нагласи дека „податоците за кредитната картичка, личните финансиски информации и податоците за пасошот не се чуваат во овој систем. „Ниедна сметка на Frequent Flyer не е компромитирана и криминалците не пристапиле до лозинки, ПИН-кодови или детали за најавување“, се вели во соопштението, извинувајќи им се на клиентите.
Извршната директорка на „Квантас“, Ванеса Хадсон, изјави дека компанијата „тесно соработува со австралиски експерти за кибер безбедност од владини агенции“.
