Честото јадење сирење и млечни производи – особено навечер, може да предизвика кошмари. Истото важи и за слатките и зачинетата храна, според ново истражување. Написот е објавен во психолошкото списание „Фронтиерс ин сајколоџи“ (Frontiers in Psychology).
Истражувачите ги проучувале искуствата на 1.082 студенти на Универзитетот „Мекјуан“ во Едмонтон, Алберта, Канада. Испитаниците одговарале на прашања за своите навики и квалитетот на спиењето, соништата и кошмарите, како и за можни врски на сѐ тоа со изборот на храна. Исто така, истражуван е и нивниот однос со храната во поширока смисла на нивното општо психичко и физичко здравје. Одговорите откриле силна врска меѓу интолеранцијата на лактоза и кошмарите. Значи, можно е гастроинтестиналните тегоби што ги доживуваат некои луѓе по внесувањето млечни производи, да бидат она што предизвикува негативни соништа.
– Кошмарите се полоши за луѓето кои не толерираат лактоза, и кои страдаат од тешки гастроинтестинални симптоми, а чиј сон е нарушен, истакна раководителот на испитувањата, д-р Торе Нилсен од Универзитетот на Монтреал.
Според него, ова има смисла, бидејќи науката знае дека и други „телесни бури“ може да влијаат на сонот.
– Кошмарите може да бидат многу вознемирувачки, особено ако се јавуваат почесто, бидејќи покажуваат склоност на будење на луѓето од сон во дисфорична состојба. Тие, исто така, може да предизвикаат однесување коешто го избегнува спиењето. И двата симптома можат да Ве лишат од мирен сон, додаде докторот.
Тој, имено, посочува дека промената на навиките во исхраната може да биде најдобриот начин за ублажување на кошмарите. Веста станува „уште полоша“, ако Вие сте љубител на благо, бидејќи слатките всушност се најдоа на врвот како најчесто пријавувана храна поврзана со променети соништа и кошмари.
Дури 31 отсто од испитаниците ги поврзаа своите најбизарни и вознемирувачки соништа со десертот, а 22 отсто – со млеко и млечни производи. Натаму, 16 насто отпаѓа на месото и 13 отсто на зачинетата храна. „Емоционално набиеното“ прејадување е поврзано со повознемирувачки соништа, додека пак, подолгите паузи меѓу јадењето здрави оброци им ги правеле соништата на студентите – поживописни и полесни за паметење.
Заклучокот на научниците е оти истражувањето му дава тежина на аргументот дека храната навистина може да го промени сонот и дека интолеранцијата на храна може да биде претходно непрепознаен извор на потешки или чести кошмари.
