Центарот за управување со кризи вечерва соопшти дека до 19 часот на територија на државава регистрирани се вкупно 23 пожари на отворен простор од кои 11 се активни, а еден е под контрола.
Активни се пожарите кај Самоков и меѓу селата Црешнево, Локвица и Слатина во општина Македонски Брод, меѓу селата Блаце и Чучер и кај Кучевишка бара во општина Чучер Сандево, кај селото Љубанци во општина Бутел, под Солунска глава меѓу изворите на Бабуна и Банина Дупка, кај селото Бешиште во Прилепско и од селото Волино кон селото Ливада во општина Охрид. Активни пожари има и долж автопатот Гостивар-Тетово каде гори ниска вегетација и кај селото Крушевица, Кавадаречко и селото Николиќ кај Дојран.
Според информациите од ЦУК, изгаснати се девет пожари, а два се локализирани.
Пожарот кај фабриката Самоков втор ден е активен, но според информациите што попладнево ги сподели директорот на Дирекцијата за заштита и спасување Стојанче Ангелов, нема опасност по фабриката. Под контрола се ставени три крака од пожарот.
– Директорот на фабриката и градоначалникот на Општина Македонски Брод ме известија дека нема потреба од дејство на „ер тракторот“ којшто цел ден дејствуваше на овој потег околу фабриката. Под контрола се ставени три крака на овој тежок пожар. Останува активен еден крак и за да се избегне опасност по блиското село „ер тракторот“ ќе продолжи да дејствува ова попладне се додека условите го дозволуваат тоа, информира Ангелов во најновата изјава.
Во земјава е прогласена кризна состојба од 30 дена на ниво на цела држава поради пожарите.
Портпаролката на Владата Марија Митева попладнево на прес-конференција соопшти дека одлуката е донесена врз основа на денешната седница на Управувачкиот комитет за координација и управување со системот со кризи.
– Ова на терен значи дека се овозможува интегриран пристап и координирано дејствување на сите надлежни институции – Армијата, полицијата, сите противпожарни единици, Центарот за управување со кризи и Дирекцијата за заштита и спасување и локалните самоуправи. Ќе се мобилизираат сите ресурси вклучително и човечки, технички, логистички се со цел да се справиме со пожарите и заштита на населението, рече Митева.
