Пишува: КОРНЕЛИЈА КОНЕСКА
Концепти од 19 век. Народите се создале како резултат на групирањето на раситнетите феуди заради заеднички интереси. Потоа, заради потребата од добра комуникација, се развива јазичен и културолошки идентитет.
Која е потребата од национализам во 21 век? Во век на глобализација кога просторот и времето и јазикот се надминати како бариери при комуникацијата? Само манипулација.
Исто е и со патриотизмот. Тоа е чувство кое се подразбира. Кој не ја сака земјата каде се родил? Но во современото живеење, во еден животен век, човек може да живее во повеќе земји, така да патриотизмот може да се дефинира и како грижа и чувство на припадност кон земјата во која си се родил, но и кон онаа во која живееш. Се друго е хипокризија.
Сосем се сложувам со констатацијата дека да бидеш горд што си се родил како припадник на одредена нација и во одредена земја е исто како да бидеш горд што си се родил во четврток.
Затоа – да се концентрираме на работите кои зависат од нас, секојдневно да се подобруваме, да им помагаме на оние на кои можеме (без оглед од која нација се), да се здружуваме заради суштински промени и да придонесуваме за доброто на заедницата, каде и да сме.
Премногу несреќи се предизвикани во име на национализмот и патриотизмот. Време е да сфатиме дека се тоа изумрени концепти кои центрите на моќ ги користат како алатки за манипулација и постигнување на сопствени цели.
