Белгискиот премиер Барт де Вевер на сослушуање пред федералните пратеници рече дека Кина има интерес да продолжи војната во Украина и дека на ЕУ би ѝ било подобро да склучи трговски договор со САД отколку да се вклучи во трговска војна.
Според Де Вевер, цитиран од локалните медиуми, Кина не поддржува воена победа за Русија во Украина, но има корист од увоз на евтина руска енергија, чија цена падна поради војната и последователните санкции против Москва.
Медиумите забележаа дека Де Вевер ги дал овие коментари по состанокот во Брисел со кинескиот министер за надворешни работи Ванг Ји минатата недела.
Според белгискиот премиер, неговата земја би била една од првите што ќе го почувствуваат влијанието на трговската војна меѓу ЕУ и САД. Според него, би било подобро да се постигне дури и некаков „среден“ трговски договор со Вашингтон.
Европската комисија вчера изрази очекување за постигнување на принципиелен трговски договор со САД во наредните денови. Портпаролот на ЕК истакна дека новиот рок е 1 август и изрази уверување дека тековните преговори ќе бидат завршени многу порано.
