Вујкото му се јавил на својот внук од сестра и го поканил во својот дом вчера околу 15 часот, но инсистрал со себе да го поведе и малолетното дете и за брзо од пристигнувањето биле убиени, информира МВР нагласувајќи дека СВР Битола ги расчисти околностите за тројното убиство.
Како што стои во објаснувањето на текот на настанот, вујкото, 63-годишниот П. Ѓоколу во 15 часот му се јавил на внукот од сестра, 43-годишниот прилепчанец со иницијали П.Ч. да дојде во неговиот дом, инсистирајќи со себе да го поведе малолетното дете.
-Според првичните сознанија, П.Ч. по поканата од неговиот вујко го зел со себе малолетниот син, по што и кажал на неговата сопруга К.Ч. (43) дека неговиот вујко инсистира да оди во негова посета заедно со неговиот син, при што истите заминале, се наведува во полициското соопштение.
Во периодот од 15:30 до 16:00 часот се слушаат истрели од оружје и најверојатно тоа е моментот кога биле убиени таткото и синот. Меѓутоа, според полицијата, никој во градот не пријавил какво било пукање во тие моменти.
-Според сознанијата до кои дојдоа полициските службеници од ОВР Прилеп, на фејсбук профил за кој се претпоставува дека е креиран и припаѓа на вујкото П.Ѓ. во 17,10 часот, поставен бил статус со сомнителна содржина каде тој ја прозива својата сестра и внукот (според времето на објавување се претпоставува дека статусот е објавен по убиството на внукот и неговиот малолетен син), објаснуваат од полицијата.
Сопругата на сега убиениот П.Ч. по извесно време се обидела на телефон да ги добие сопругот и синот и откако не можела да ги исконтактира отишла пред куќата на вујкото. На довикувањето никој не одговорил, ама автомобилот на сопругот бил паркиран. Сопругата во 9,20 часот пријавила во полицијата и потоа почнало да се разрешува ужасниот настан.
Првиот обид на полицијата да влезе бил неуспешен. Вујкото фрлил бомба која само испуштила чад, а потоа почнал да пука, на што полицијата возвратила.
Ужасниот настан завршил околу еден часот по полноќ, на помош стигнале и припадниците на единицата Тигри. Во 1,15 часот лекар само констатирал смрт кај три лица. Полицијата во куќата нашла повеќе оружје.
-Во 01,20 часот полициски службеници од ОВР Прилеп во присуство на јавен обвинител извршија увид на ул.„Стеван Апостолоски “ при што од увидот констатирано било дека во куќа со приземје и кат со дворно место пред влезната врата како и во домот беа пронајдени чаури од огнено оружје , како и влезно излезни траги од проектили. Во ходникот на подот пронајдена била и една рачна бомба М93. Исто така на влезот од собата пронајден бил пиштол калибар 9 мм и пиштол калибар 7,65 мм , документи, парични средства како и договори за имот и останати документи.
Јавен обвинител издаде наредба да се изврши обдукција.
