Во неделата кога се славеше уште едно наводно „спасување“ на Охридскиот Регион од листата на светски наследства во опасност, граѓанската организација Фронт 21/42 предупредува дека зад оваа политичка победа стои реален и опасен пораз – продолжување на уништувањето на нашето највредно природно и културно наследство.
„Во текот на изминатата седмица нашето единствено природно и културно светско наследство по трет пат беше ‘спасено’ од страна на политичарите“, стои во нивната анализа. „Исто како и два пати претходно, актуелните домашни политичари успешно излобираа политичарите во Комитетот за светско наследство да ја игнорираат проценката на состојбата направена од страна на експертите врз основа на директен увид на терен.“
Фронт 21/42 остро ја критикува реториката на „спасителите“ од власта и „загрижените“ од опозицијата, велејќи дека „за нив функцијата на најголемото природно и културно богатство на земјата е да го обели имиџот на нивната партија и оцрни оној на противниците“.
Организацијата потсетува дека и претходните „решителни акции за спас“ не довеле до реални резултати, туку само продуцирале нови документи, повторно со исти мерки и нови рокови кои никој не ги исполнува.
Во однос на последната одлука на Комитетот, се наведува:
„Нашата држава (и Албанија) нема ништо против да изработи Посакувана состојба на зачуваност и да усвои сет на корективни мерки – востановен механизам за светските наследства во опасност. Тоа што нашите политичари се изборија да не се оствари е мониторинг врз реалното спроведување на овие мерки, како и пристап до финансии за истите, но финансии кои подлежат на редовни извештаи со докази и контроли.“
Фронт 21/42 реагира и на изјавата на премиерот околу дивоградбите, посочувајќи дека „не ги спомена дивоградбите во Студенчишко блато, ниту хотелот кој се гради на ридот во Горица – градби кои УНЕСКО втора година по ред посебно ги истакнува во одлуките.“
„Да нема никаква заблуда“, нагласуваат од организацијата, „се додека не се отстрани хотелскиот комплекс во Горица, во земјата не владее правото, туку криминалот и корупцијата, заштитени од сите одговорни општински и државни институции.“
Во реакцијата се посочуваат и низа други проблеми – од легализација на дивоградби, лов на пастрмка, до присуството на конструкции во езерото како Куба Либре, платформите во Св. Наум, Канео и други.
„Автентичните вредности и интегритетот на нашето единствено природно и културно светско наследство се на раб на конечно исчезнување. Не смееме да дозволиме ‘спасителите’, кои трет пат по ред ‘купија’ уште една година за да го спасат имиџот на партијата и да ги заштитат разните зделки, неповратно да ги обезличат и избришат овие вредности“, предупредува Фронт 21/42.
„Сите ние сме одговорни пред нашите и идните генерации во целиот свет“, порачуваат од организацијата.
Комитетот за светско наследство на УНЕСКО во Париз на расправа на 10 јули донесе одлука да се одложи впишувањето на Охридскиот регион на Листата на светски културни и историски наследства во опасност.
Охрид и државата добија уште една година да исполнат низа задолженија и да постапат по препораките нотирани во претходните извештаи на Реактивните мониторинг мисии, за што ќе треба до УНЕСКО да достават извештај до 1 февруари наредната година.
Ј. Ѓ.
