Министерството за правда на САД ја отпушти федералната обвинителка Морин Коми, која, меѓу другото, работеше и на случаите кои вклучуваа обвиненија против соработничката на Џефри Епштајн, Гислејн Максвел, и музичарот Шон „Диди“ Комбс
Како што се наведува, не ѝ било соопштено која е причината за отпуштањето, но ѝ бил доставен меморандум во кој се наведува дека претседателот на САД има овластување да отпушта обвинители според член 2 од американскиот Устав.
Обвинителката Коми е најстарата ќерка на поранешниот директор на ФБИ, Џејмс Коми, кого американскиот претседател Доналд Трамп го отпушти за време на неговиот прв мандат во Белата куќа, а кој моментално е под истрага заедно со поранешниот директор на ЦИА, Џон Бренан.
