Во недела, 20 јули, со почеток во 20:30 часот, во Спортскиот центар „Јане Сандански“ во Скопје, свечено ќе биде отворен најголемиот мултиспортски настан што досега се одржал во Македонија – Европскиот младински олимписки фестивал (ЕМОФ) Скопје 2025. Свечената церемонија ќе го означи почетокот на седумдневен спортски и културен спектакл (од 20 до 26 јули), кој ќе ги обедини младите спортисти од цела Европа во духот на фер-плеј, солидарност и пријателство.
Како дел од свеченото отворање, ќе се одржи голема парада на сите 49 спортски делегации, како и на Тимот на бегалци под покровителство на ЕОК, кој ќе добие заслужено внимание во духот на еднаквоста и инклузивноста. Илјадници млади спортисти, на возраст од 14 до 18 години, ќе продефилираат низ арената со знамињата на своите држави, носејќи ја со себе енергијата и надежта на новата европска генерација.
Публиката ќе има можност да ги проследи воведните обраќања, вклучително и на Претседателот на Европските олимписки комитети, Спирос Капралос, кој ќе се обрати пред европската спортска јавност и ќе ја истакне важноста на ЕМОФ како платформа за развој на младинскиот спорт и за културна размена преку натпреварување, почитување и заедништво. Фестивалот потоа официјално ќе го отвори Претседателката на Република Македонија, Гордана Силјановска Давкова, со што ќе започне најзначајната спортска недела што досега се организирала во нашата земја.
Отворањето ќе биде збогатено со уникатен сценско-музички спектакл што ќе ја претстави македонската култура, звук и визуелна уметност. Некои од најпрепознатливите и најпопуларни македонски музички имиња ќе настапат на сцената, придружени од современа сценографија, мултимедија и перформанси инспирирани од олимписките вредности. Шоуто е внимателно осмислено за да го прикаже културното богатство на Македонија пред европската публика и да создаде атмосфера на единство, гордост и свеченост – вистински емотивен и незаборавен почеток на фестивалот.
Централно место во церемонијата ќе има изведбата во живо на официјалната химна на ЕМОФ Скопје 2025 – „Together We Shine“, композиција која веќе се препознава како симбол на заедништво, младешка енергија и олимписки дух. Оваа моќна музичка порака ќе ја изведат четири извонредни македонски изведувачи – Сара Мејс, Лара Иванова, Јанг Дади и Александар Тарабунов. Автор на музиката и текстот е реномираниот продуцент Роберт Билбилов. Химната е многу повеќе од песна – таа е повик до Европа, манифест на надеж, единство и младинска сила.
ЕМОФ Скопје 2025 ќе вклучува натпревари во 15 спортски дисциплини: атлетика, пливање, кошарка, баскет 3×3, ракомет, одбојка, џудо, спортска гимнастика, друмски велосипедизам, маунтајн бајк, кајак слалом, бадминтон, стрелаштво, пинг-понг и таеквондо. Натпреварите ќе се одржуваат на спортски објекти со меѓународен стандард во Скопје и Куманово, додека натпреварите во спортска гимнастика ќе се одржат во Осиек, Хрватска, во соработка со Европскиот и Хрватскиот олимписки комитет.
Се очекува учество на повеќе од 4.000 млади спортисти, тренери, спортски официјални лица и тимски претставници, како и стотици новинари, волонтери и гости. Македонија ќе биде претставена од контингент од речиси 200 млади спортисти – рекорден број во историјата на нашето учество на ЕМОФ.
Покрај спортските натпревари, фестивалот ќе понуди и богата културна програма, фан-зони, едукативни работилници, интерактивни активности водени од Европските младински олимписки амбасадори, како и бројни појавувања на официјалната маскота – Шајни (Shiny).
Свеченото отворање на ЕМОФ Скопје 2025 е можност Македонија да се претстави како отворена, модерна и добро организирана европска земја. Настанот ќе се пренесува во живо на Македонската радио-телевизија (МРТ), а публиката низ цела Европа ќе може да го следи преку EOC TV. Организацискиот комитет ги повикува сите љубители на спортот да бидат дел од овој историски момент – било од трибините или од своите домови – и да учествуваат во најголемата спортска приказна што досега се случила во нашата земја.
Организацискиот комитет на ЕМОФ Скопје 2025 упатува искрена благодарност до општините Кисела Вода, Аеродром, Центар, Карпош, Гази Баба, Сарај и Куманово за нивната извонредна соработка, поддршка и логистичка помош во подготовката и реализацијата на овој престижен настан. Преку нивната посветеност и отвореност, овие локални заедници станаа неразделен дел од фестивалот, уште еднаш потврдувајќи дека успехот на големите проекти се гради заеднички – со тимски дух, визија и партнерство.
