Човекот на возраст од 42 години кој со нож нападна 11 лица во супермаркет „Волмарт“ во американската сојузна држава Мичиген ќе се соочи со обвиненија за тероризам и обид за убиство, соопштија надлежните.
Нападот се случи во саботата во градот Траверс Сити, околу 400 километри северозападно од Детроит. Мотивот сѐ уште не е познат, рече шерифот на округот Гранд Траверс, Мајкл Шеа.
Осомничениот, кој има полициско досие со претходни случаи на напад и поседување дрога, напаѓал со преклопен нож со сечило од 9 сантиметри. Тој бил совладан од присутни граѓани и потоа приведен.
Според болницата „Мансон Медикал Центар“, сите повредени ќе преживеат. Еден пациент веќе е пуштен на домашно лекување, додека двајца се во сериозна состојба.
Меѓу повредените има шест мажи и пет жени на возраст од 29 до 84 години.
