Делегацијата на палестинското движење Хамас во Египет од посредниците доби нов предлог за договор за прекин на огнот во Појасот Газа.
– Предлогот претставува рамка за почеток на преговори за трајно примирје. Хамас ќе спроведе внатрешни консултации со своето раководство и со лидерите на сојузничките групи, изјави извор од Каиро за АФП.
Текстот на предлогот во голема мера се совпаѓа со претходната понуда на САД, која предвидува 60-дневно примирје и ослободување на израелските заложници во две фази. Заложниците беа киднапирани на 7 октомври 2023 година за време на напад на Хамас врз Израел, што ја предизвика војната во Газа.
Американското издание „Аксиос“ денеска објави дека катарскиот премиер шеик Мохамед бин Абдулрахман Ал Тани ќе се сретне во градот Ел Аламeјн со египетскиот претседател Абдел Фатах ал Сиси и со претставници на Хамас и други палестински групи. Целта е да се водат директни разговори за можни решенија на конфликтот.
Вчера египетски и катарски посредници веќе се сретнаа со палестинската делегација и им го предадоа новиот предлог. Според извори, средбата не донела суштински напредок, поради што катарскиот премиер решил денеска да патува за Египет, пренесе „Аксиос“.
