Повеќе од 62.000 Палестинци се убиени од октомври 2023 година. Преживеаното население трпи немилосрдно бомбардирање во опколената енклава, глад и секојдневни убиства додека очајно бараат храна за своите семејства и гледаат како умираат најблиските.
Најмалку 30 Палестинци беа убиени во израелските напади низ Појасот Газа вчера, вклучувајќи 14 кои бараа храна.
Министерството за здравство на Газа соопшти дека уште петмина Палестинци починале од неухранетост како резултат на повеќемесечната израелска блокада во изминатите 24 часа, вклучувајќи две деца.
Израел ги засилува нападите врз градот Газа, најголемиот и сега целосно уништен урбан центар на територијата, бидејќи планира да го освои и насилно да расели десетици илјади луѓе во концентрациони зони на југ.
До вчера познатиот број на луѓе кои починале од глад во Газа достигна најмалку 263, вклучувајќи 112 деца.
Светската програма за храна (ВФП) на Обединетите нации предупреди дека повеќе од 320.000 деца – целото население под пет години во Газа – се изложени на ризик од акутна неухранетост од јули 2025 година.
-Семејствата преживуваат со основни потреби, со мала разновидност во нивната исхрана, соопшти ВФП. Агенцијата повика на итен прекин на огнот за да се овозможи испорака на хуманитарна помош во голем обем.
УНРВА предупреди дека децата во енклавата веќе изгубиле три години школување, ризикувајќи да станат „изгубена генерација“ и го повтори својот повик за итен прекин на огнот.
Амнести интернешнл го осуди Израел за „систематско уништување на здравјето, благосостојбата и општественото ткиво на палестинскиот живот“.
Сепак, постои надеж дека Хамас се согласил со новиот предлог на регионалните медијатори за договор за прекин на огнот во Газа и ослободување на заложниците со Израел.
Хамас ќе ослободи околу половина од преостанатите 50 израелски заложници, од кои се верува дека 20 се живи, во две фази за време на 60-дневниот привремен прекин на огнот, во кој период би се воделе преговори за траен прекин на огнот и повлекување на израелските трупи.
