Бадентеровото правило во одредени моменти ја доведува во прашање функционалноста на државата, истакна денеска лидерот на Движењето ЗНАМ Максим Димитриевски прашан за коментар за изјавата на министерот за правда Игор Филков дека Бадентеровото мнозинство се злоупотребува и оти можеби е време за негово ревидирање, пренесува МИА.
– Изјавата на министерот Филков се однесува исклучиво за функционалноста на Бадентеровото правило. За нас како политички субјект, Рамковниот договор е завршена работа, апсолвирана и тој во целост е исполнет и реализиран. Но факт е дека во одредени моменти правилото на Бадентер ја доведува во прашање функционалноста на државата и тоа веќе со потврда ќе го имаме по завршувањето на локалните избори, рече Димитриевски.
Тој подвлече дека партијата го поддржува Рамковниот договор и оти е во целост исполнет, но одредени политички субјекти го злоупотребуваат Бадентеровото мнозинство.
Димитриевски попладнево се обрати на првиот партиски Летен камп за млади што се одржува во Струга.
