Социјалдемократскиот сојуз на Македонија најавува дека до крајот на неделата ќе биде готова работна верзија на декларацијата за национален консензус за европската интеграција. На денешната прес-конференција, претседателот на СДСМ, Венко Филипче, ја истакна суштината на овој чекор и испрати јасна порака до јавноста и политичките чинители:
„Кога станува збор за националните интереси, кога станува збор за врвните државни интереси, и стратегиска цел на нашата земја, тоа е Европската унија, тука ниту јас лично ниту сметаме дека тоа треба да е предмет на прекупување во дневната политика, не калкулираме, нема итроштини, не правиме никакви трикови.“
Тој порача дека очекува одговорен пристап од сите политички партии:
„Сметам дека доколку и ВМРО-ДПМНЕ и премиерот имаат ваков сериозен пристап кон темата, а не гледам причината да немаат, тогаш сметам дека ќе најдеме решение.“
Филипче подвлече дека се работи на инклузивен и транспарентен процес:
„Документот се изработува, до крајот на неделата, верувам дека ќе имаме една работна верзија, ќе го прикажеме на многу чинители – на сите политички партии, на нашите стратешки партнери, на јавноста, на новинарите, нека даде мислење и експертската јавност, поради тоа што сметам дека со иднината на граѓаните не треба да калкулираме.“
Во однос на грижите во јавноста, Филипче истакна:
„Јас ја разбирам грижата на граѓаните, а тоа меѓу другото и на некој начин и го изразија за време на минатото годишните избори… и сметам дека таа грижа на граѓаните не треба да ја ставиме по страна.“
„Во ниту еден документ не се загрозени ниту националните интереси, ниту е направено некакво предавство“, нагласи тој, и додаде дека е време за јасна дефиниција на заедничките позиции:
„Мора сите политички чинители да седнат заедно на маса и да одредиме што е тоа, што јасно и гласно – еве во еден документ – може би цитирано од повеќе претходни документи, договори, резолуции, треба да го формализираме за да знаеме како ќе продолжиме напред и да ги информираме граѓаните за тоа.“
Филипче исто така предложи да се побара и поддршка од ЕУ во некои клучни делови од процесот:
„Да побараме помош, можеби, во тој документ, од Европската Унија, од Европската заедница, во делот на историската комисија, некои нивни експерти, нивно искуство.“
„Како што реков вчера, најлошото е да не се прави ништо,“ заклучи лидерот на СДСМ.
