Луѓето имаат право на мирен протест. Тоа е основата на вредностите на нашата земја, напиша на Х британскиот премиер Кир Стармер во врска со вчерашниот протест во Лондон.
– Но, нема да толерираме напади врз полицајци кои ја вршат својата работа или луѓе кои се чувствуваат заплашено на нашите улици поради нивното потекло или бојата на нивната кожа, додаде тој.
– Британија е нација гордо изградена врз толеранција, различност и почит. Нашето знаме ја претставува нашата разнолика земја и никогаш нема да го предадеме на оние кои го користат како симбол на насилство, страв и поделба, нагласи британскиот премиер.
Над 100.000 демонстранти учествуваа на вчерашниот протест во Лондон, организиран од крајнодесничарскиот активист Томи Робинсон, соопшти лондонската полиција.
Протестот, одржан под слоганот „Да го обединиме Кралството“, беше проследен и со контрапротест на движењето „Исправи се против расизмот“, со околу 5.000 учесници.
Над 1.000 припадници на полицијата беа распоредени низ улиците на британскиот главен град, воспоставувајќи тампон-зона меѓу двете групи за да се спречат судири. Британските медиуми јавуваат дека неколку полицајци биле нападнати од поддржувачите на Робинсон.
Според поддржувачите на Робинсон, чие вистинско име е Стивен Јаксли-Ленон, на протестот учествувале над три милиони луѓе, што е значително повисока бројка од официјалните податоци.
Робинсон, познат по своите националистички и антимигрантски ставови, го опиша протестот како борба за слободата на говорот и заштита на британското наследство. Демонстрантите носеа знамиња на Англија и Велика Британија, скандирајќи „Си ја сакаме земјата назад“ и држејќи транспаренти со пораки како „Запрете ги бродовите“ и „Спасете ги нашите деца“.
Контрапротестите упатија порака против крајната десница со транспаренти „Добредојдовте, бегалци“.
