Хамас во четвртокот вечерта ја објави својата најсилна порака за израелските заложници во Газа, велејќи дека копнената инвазија на израелскиот премиер Бенјамин Нетанјаху во Газа значи дека Израел ја изгубил секоја шанса да ги извлече своите заложници од територијата – мртви или живи, пренесува Си-ен-ен.
Во порака напишана на хебрејски јазик и упатена до израелската војска и раководство, военото крило на Хамас, Бригадите Ал-Касам, соопшти дека Нетанјаху ефикасно изрекол смртна казна за заложниците.
„Вашите затвореници се распоредени во населбите на Газа и ние нема да се грижиме за нивните животи сè додека Нетанјаху одлучи да ги убие. Почетокот на оваа криминална операција и нејзиното проширување значи дека нема да примите ниту еден затвореник, ниту жив ниту мртов, а нивната судбина ќе биде иста како онаа на (Рон Арад)“, се вели во соопштението.
Арад е офицер за системи за оружје на израелските воздухопловни сили кој исчезнал во акција во 1986 година во Либан и за кој се верува дека бил заробен од воената група Амал, а подоцна предаден на Хезболах.
Во последователно соопштение, Хамас изјави дека се подготвува за борба и дека „Газа ќе биде гробишта за вашите војници“.
Соопштението на Хамас доаѓа во време кога јавниот гнев против Нетанјаху и неговата влада продолжува да расте во Израел, а неделните демонстрации во Тел Авив со кои се бара крај на војната и прекин на огнот достигнуваат врв – а некои семејства на заложници го предводат бесот.
Многу семејства на заложници, исто така, изјавија дека плановите на Израел да го преземе градот ќе бидат смртна казна за нивните најблиски. Во Газа остануваат 48 заложници, од кои 20 се верува дека се живи.
Д. Мишев / Цивил Медиа
