На Универзитетска клиника за неврохирургија е извршена комплексна микрохируршка интервенција кај 57-годишен пациент со руптурирана аневризма на мозочен крвен сад.
– Станува збор за операција која за првпат во Македонија е изведена со примена на интраоперативна флуоресцентна видеоангиографија. Оваа иновација е значаен чекор напред во модернизацијата на македонското здравство. Примената на интраоперативната флуоресцентна видеоангиографија ја зголемува безбедноста на пациентите и ја подобрува ефикасноста на хируршките интервенции, вели министерот за здравство Азир Алиу.
Оваа иновативна метода претставува напредна техника која овозможува визуелизација на крвниот проток во реално време за време на операцијата.
– Со примена на контрастно средство, хирурзите можат прецизно да ја проценат проодноста на крвните садови и да го потврдат целосното исклучување на аневризмата, што е клучно за успешен исход, појаснува д-р Благој Шунтов, специјалист по неврохирургија и раководител на тимот.
Инаку, во хируршкиот тим беа д-р Благој Шунтов, асистентите д-р Мирко Мишел Мирчевски и д-р Влатко Атанасов, а во анестезиолошки тим беа д-р Сања Ѓурчевска, д-р Радмила Панговска, медицинските сестри Ирена Стојанова, Гордана Мицковска и Даниела Делова, и инструментарките: медицинска сестра Маја Спировска и медицинска сестра Наташа Мирчевска.
Операцијата помина без компликации, а пациентот се опоравува без потешкотии. Примената на оваа напредна техника претставува значаен напредок во третманот на неврохируршки пациенти и ја потврдува посветеноста на Клиниката за неврохирургија во примена на најновите медицински технологии. Оваа иновација претставува значаен чекор напред во модернизацијата на македонското здравство и ја потврдува посветеноста на здравствените институции во примената на најновите медицински технологии, информираат од Министерството за здравство.
