Планот на американскиот претседател Доналд Трамп за Газа носи надеж и перспектива за мир и се надеваме дека ќе го одржи во живот решението за две држави, што ќе му гарантира безбедност на Израел, а на Палестинците ќе им даде можност да дојдат до државност по легитимен пат, изјави денеска претседателката на Европскиот парламент Роберта Мецола.
– Сега е на Хамас да го прифати предлогот. Оружјето мора да замолчи и заложниците да бидат ослободени. Тоа е патот што може да доведе до завршување на цикличното и децениско насилство, рече Мецола при пристигнувањето на неформалниот Самит на ЕУ во Копенхаген.
Мецола нагласи дека во фокусот на денешниот Самит ќе бидат и упадите на летала во воздушниот простор на ЕУ, особено по инцидентот со дроновите во Данска од пред неколку дена.
– Очигледно е дека она што порано беше тајно сега е јавно, а тоа значи дека треба да разговараме за откривање, за одбрана и за одвраќање, рече Мецола, додавајќи дека во тој контекст ќе се разговара и за соработката со НАТО и за создавањето на „Ѕидот од дронови“.
Мецола додаде дека руските напади врз Украина се интензивираат, па затоа ЕУ треба што побрзо да го усвои 19-от пакет санкции кон Москва и да работи на целосно ослободување од руските фосилни горива, со цел да се осигура дека воопшто не е енергетски зависна од Русија.
На прашање за коментар на застојот во усвојувањето на регулативи од страна на институциите на ЕУ, Мецола истакна дека ваквата состојба ја потврдува потребата од внатрешно реформирање на Унијата и поедноставување на процедурите.
– Реалноста е дека е тешко да се обезбедат политички мнозинства. Тешко е да се најдат мнозинства за носење закони. Досега успевавме во тоа, но ќе биде потребна политичка волја, а таа политичка волја ќе значи испорачување на резултатите што ги бараат гласачите, рече Мецола.
Таа додаде дека институциите меѓусебно си префрлаат вина за тоа кој е одговорен за застојот, но на гласачите не ми е грижа дали вината е во Советот или Парламентот или колку време и треба на Комисијата да предложи нешто.
– Наши гласачи се нашите бизниси, нашите семејства и нашите земјоделци и тие бараат резултати, додаде Мецола.
