Судијата Арун Субраманијан го одби барањето на американскиот рапер Шон „Диди“ Комбс да ја поништи пресудата против него, пред изрекувањето казна закажано за в петок, објави „Еј-би-си њуз“ (ABC News).
Обвинителите, инаку, сметаат дека „децениите неконтролирано насилство“ на Комбс и психолошката, емоционалната и физичката штета што им ја нанел на своите жртви се доволна основа за строга казна, според документите. Меѓу доказите има снимки од безбедносни камери на хотел и сведоштва од пејачката Касандра „Кеси“ Вентура (некогашна девојка на Диди), која го обвини за физичко и психолошко злоставување.
Федералните обвинители претходно побараа Комбс да биде осуден на најмалку 11 години затвор по две обвиненија, велејќи дека бил „насилен и не се покајал“ и ги оставал своите жртви во страв. Тој, инаку, е ослободен од обвиненијата за трговија со луѓе и рекетирање.
Во прилог на можната построга казна, Обвинителството достави писма од поранешни соработници на Диди и жртви, покрај Вентура – и поранешната вработена Мија. Се бара казната „да го одрази целосниот обем на штетата“ и „да испрати порака дека нивните животи и гласот се важни“. Изрекувањето на пресудата е закажано за задутре во Федералниот суд во Њујорк.
