Пратеничките групи во Европскиот парламент на седница што траела до доцна синоќа не успеаја да постигнат договор за предлог-документот за намалување на административните барања за корпорациите, кој е дел од т.н. омнибус за поедноставување, предложен од Европската комисија со цел намалување на бирократските процедури во ЕУ.
Ова дополнително го поттикна незадоволството на Советот на ЕУ и на Европската комисија, чии претставници го обвинуваат Европарламентот дека го забавува усвојувањето на пакетот регулативи предвидени со омнибусот и дека ги поткопува напорите за намалување на бирократијата.
Европратениците ги отфрлаат ваквите обвинувања, нагласувајќи дека со предлог-омнибусот треба да се преработат „цел куп закони“ на ЕУ донесени од 2019 година, што, според нив, не е едноставно. Тие потенцираат дека предлозите на Комисијата се обемни и опфаќаат повеќе ресори, што предизвикува полемики меѓу парламентарните комитети околу надлежностите за одредени предлог-документи, со што постапката за нивно усвојување би можела да се одолговлече со месеци, а при тоа да се занемари дебатата за нивната суштина.
Дополнително, дел од европратениците забележуваат дека предложените мерки во голема мерка се во корист на големите бизниси, како и дека дел од нив се спроведуваат под притисок на Администрацијата на американскиот претседател Доналд Трамп.
Извори во ЕП посочуваат дека усвојувањето на предлогот на синоќешниот состанок заглавило поради несогласувања меѓу претставници на партиските групи од т.н. проевропско парламентарно мнозинство. Според истите извори, Европската народна партија (ЕПП) се заканила дека би можела да побараа поддршка од десничарските и екстремно десничарските групи за усвојување на предлогот, со што би прифатила некои од нивните иницијативи за дополнително олеснување на постапките и „дебирократизација“.
Но, и покрај овој застој, претставници на пратеничките групи се уште се оптимисти дека е остварлива целта за усвојување на омнибусот до крајот на годината.
Медиумите во Брисел проценуваат дека ваквиот застој пред се е показател за актуелната фрагментираност во Европскиот парламент, кој по ланските евроизбори „сврти в десно“ со значително зголемување на бројот на европратеници од редовите на десницата и екстремната десница, на сметка на зелените и пред се на либералите, кои се дел од т.н. проевропско мнозинство заедно со ЕПП и Прогресивната алијанса на социјалистите и демократите (СД).
Партите од ова мнозинство, кои ја поддржуваат Европската комисија, на почетокот ја поздравија и поддржаа нејзината иницијатива за пакетот мерки за административно поедноставување, но сега социјалдемократите сметаат дека дерегулацијата не треба да се спроведе по брза постапка.
Претседателката на СД, шпанската европратеничка Ираче Гарсија Перез вчера изјави дека нејзината група е подготвена за постигнување договор за омнибусот, но дека тие измени не смее да бидат на сметка на човековите права и животната средина.
Ваквиот застој пред се создава проблеми за Европската комисија и нејзината претседателка Урсула фон дер Лајен, кои се под притисок на земјите членки за забрзување на постапката за намалувањето на бирократијата. Меѓу нив меѓу погласните е германскиот канцелар Фридрих Мерц, кој во пресрет на денешниот неформален Самит на ЕУ во Копенхаген изрази загриженост поради бавното спроведување на препораките од извештајот на поранешниот италијански премиер Марио Драги за потребните реформи во Унијата за зајакнување на нејзината конкурентност, меѓу кои еден од клучните предлози е и административното поедноставување.
Медиумите оценуваат дека во вакви услови ЕПП, од чии редови се и Фон дер Лајен и Мерц, како и половина од еврокомесарите и членовите на Советот, би можела да бара нови сојузништва меѓу десничарските партии, кои се понаклонети кон реформите од омнибусот од левицата, или пак да ја искористи таквата можност како закана кон своите партнери од проевропското мнозинство, со цел да ги натера ретерираат во некои од своите барања и да го забрзаат процесот на усвојување на правилата за поедноставување.
