Светскиот клупски шампион Барселона со вечерашното гостување во спортската сала „Боро Чурлевски“ ќе биде четвртиот шпански ракометен клуб што играл во Битола.
Првиот дуел на Пелистер со шпански тим воедно е првиот настап на битолчани на европската ракометна сцена кои како прв македонски клуб во 1986 година во тогашната ИХФ европска ракометна лига ги одмерија со Атлетико од Мадрид. Битолчани во двомечот не успеаја да го минат првото коло, но како домаќини заслужено го совладаа Атлетико Мадрид со 24:19. Зелено-белиот дрес во 1986 година меѓу другите го носеа голманот Ванчо Јовановски, Абдула Јусуфовски, Пепи Манасков, Звонко Шундовски, Драган Маринковиќ, Цане Крстевски и Боро Чурлевски чие име денес го носи спортската сала во Битола.
Вториот дуел со шпански клуб Пелистер го одигра во 2005 година во тогашната Лига на шампиони и се сретна со супер клубот Портланд Сан Антонио од Памплона. Македонскиот шампион беше совладан на двете средби со 33:18 и 29:20.
Третата македонско-шпанска средба во лигата на шампионите, битолчани ја имаа во 2019 година со Бидасоа, клуб од градот Ирун која имаше идентичен резултат 26:25, со по една победа на свој терен, анализираше дописникот на МИА од Битоола. Патем, тимот на Бидасоа Ирун во моментов е на чело на шпанската АСОБАЛ Лига.
Вечер од 20:45 часот за прв пат во Битола гостува повеќекратниот шпански, европски и светски шампион. Во дуелите со шпанските екипи на домашен терен пелистерци имаат предност од 2:1, но во овој момент никој не размислува за вечерашниот резултат, туку за спектаклот кој треба да го приредат ракометните ѕвезди на Пелистер и Барса.
