Израелскиот премиер Бенјамин Нетанјаху денеска, по едномесечна пауза, повторно се појави во Окружниот суд во Тел Авив за да сведочи во судскиот процес за корупција.
Судењето на Нетанјаху беше одложено поради еврејските празници и неговото патување во Њујорк на 80-тото заседание на Генералното собрание на Обединетите нации.
Израелскиот јавен радиодифузен сервис КАН објави дека министрите и членовите на Кнесетот од партијата Ликуд на Нетанјаху присуствувале на сослушувањето за да го поддржат премиерот.
Нетанјаху ја напуштил судницата на некое време откако добил плик од еден од неговите помошници, додаде медиумот.
Обраќајќи се пред израелскиот Кнесет во понеделникот, американскиот претседател Доналд Трамп побара од својот израелски колега Исак Херцог да одобри помилување за Нетанјаху во неговото судење за корупција.
Според израелскиот закон, претседателот има овластување да помилува криминалци или да ги ублажи нивните казни врз основа на потребните информации или мислења на надлежните тела, како што се министрите за правда или одбрана. Израелскиот министер за правда Јарив Левин, од партијата Ликуд на Нетанјаху, изрази поддршка за помилувањето на премиерот, објави Једиот Ахронот.
Левин рече дека судењето на премиерот никогаш не требало да започне и дека неговото постоење е спротивно на правдата и интересите на државата. Десничарскиот министер за образование Јоав Киш, од партијата Ликуд, исто така, побара судењето да се откаже, велејќи дека Израел се соочува со „сериозни безбедносни предизвици и егзистенцијални закани“.
Нетанјаху сведочењето во случајот го започна во јануари негирајќи ги сите обвиненија. Станува збор за три случаи на корупција.
Првиот, заведен како предмет 1000, вклучува обвинување дека премиерот и неговото семејство примале скапи подароци од богати бизнисмени во замена за услуги.
Вториот, случај 2000, се однесува на наводни преговори со Арнон Мозес, издавач на израелскиот дневен весник Једиот Ахронот, со цел да се добие поволно медиумско известување, додека третиот, случај 4000, се смета за најсериозен и вклучува давање помош на Шаул Елович, поранешен сопственик на веб-страницата „Вала“ и телекомуникациската компанија „Безек“, во замена за поволно медиумско известување.
Нетанјаху, чие судење започна на 24 мај 2020 година, е првиот израелски лидер кој сведочи како обвинет.
Тој, исто така, се соочува со обвиненија за воени злосторства и злосторства против човештвото за нападот врз Газа по масакрот на Хамас на 7 октомври 2023 година, а Меѓународниот кривичен суд издаде налози за апсење за него и поранешниот министер за одбрана Јоав Галант во ноември 2024 година за злосторства во Газа, каде што од октомври 2023 година се убиени речиси 68.000 луѓе, претежно жени и деца.
