Долниот дом на парламентот на Канада синоќа ласаше со тесно мнозинство за да го поддржи првиот буџет предложен од владата на премиерот Марк Карни, со што се избегна заканата од предвремени избори за помалку од една година.
Пратениците гласаа со 170 гласови спрема 168 за да го усвојат предлогот што му овозможува на Долниот дом да започне со разгледување на буџетот. Иако треба да се гласа повеќе во наредните месеци, резултатот од вчера покажа веројатност дека буџетот ќе биде усвоен.
Либералите на Карни немаат апсолутно мнозинство во Долниот дом со 343 места и им е потребна поддршка или воздржаност од неколку опозициски пратеници.
Буџетот на Карни – економската рамка за следната фискална година – бара двојно зголемување на буџетскиот дефицит за справување со американските царини и финансирање на програмите за одбрана и домување.
Иако предлага намалување на бројот на вработени во федералната влада, буџетот не содржи толку мерки за штедење колку што се плашеа некои противници на владата.
Неодамнешните анкети покажуваат дека доколку изборите се одржат сега, либералите би ја задржале власта.
Централно-десничарската опозициска Конзервативна партија се бори со внатрешни поделби откако загуби на изборите од либералите во април, а нејзиниот лидер, Пјер Пољевер, ќе се соочи со формална проверка на резултатите во јануари.
