Комисијата ја заврши својата работа во февруари оваа година, а документот од седум страници од кардиналот Џузепе Петроки му беше доставен на папата Лав на 18 септември и сега е објавен на барање на папата, објави „Ватикан њуз“.
За време на својата прва седница во 2021 година, Комисијата заклучи дека Црквата историски ја признава титулата ѓакон за жените, но без јасно значење.
Исто така, едногласно беше оценето дека систематското проучување на ѓаконството покренува прашања за компатибилноста на женското ѓаконско ракополагање со католичката доктрина.Комисијата го поддржа воспоставувањето нови служби што би можеле да ја подобрат соработката меѓу мажите и жените во Црквата.
На втората седница во 2022 година, со мнозинство гласови беше усвоена изјава со која се исклучува продолжувањето на постапката за прием на жени во ѓаконството како степен на свети чинови, но без да се донесе конечна одлука.
На последната седница од 2025 година беше разгледан придонесот на Синодот, но беше заклучено дека бројот на примени трудови – само 22 од мал број земји – не го претставува гласот на целата Црква.
Кардиналот Петроки заклучи со наведување дека постојат две силни теолошки ориентации: едната го смета ѓаконството за служба одвоена од свештенството, што би можело да го отвори патот за жените, додека другата инсистира на единството на светиот чин и верува дека вклучувањето на жените во првиот степен би го направило исклучувањето од другите степени неодржливо.
Поради оваа причина, смета кардиналот, понатамошните чекори бараат ригорозно и широко проучување на идентитетот и мисијата на ѓаконството, особено затоа што во многу делови од светот ѓаконството е или речиси непостоечко или се преклопува со лаичките улоги.
