Како што последната сезона на популарната серија Stranger Things се приближува кон крајот, актерката Винона Рајдер повторно е во центарот на вниманието со улогата на Џојс Бајерс – мајка која очајно го бара својот исчезнат син. Во ново интервју за списанието Interview, Рајдер открива дека нејзината изведба е длабоко поврзана со вистинска трагедија од нејзината младост.
Трагедија од родниот град што ја оформила нејзината изведба
Рајдер, денес 54-годишна, објасни дека инспирацијата за улогата на загрижена мајка ја црпела од случајот со Поли Клас, девојка од нејзиниот роден град која била киднапирана и убиена во раните деведесетти, пишува Unilad.
„Го имав ова искуство во моите рани дваесетти: постоеше девојка од градот каде што пораснав. Се викаше Поли Клас и беше киднапирана. Ја познавав нејзината фамилија“, изјави Рајдер.
Поли била пронајдена мртва два месеца по исчезнувањето, а актерката активно се вклучила во потрагата, нудејќи награда од 200.000 долари за информации.
„Правев сè што можев за да им помогнам, за приказната да остане во вестите. Кога сте опкружени со таква опиплива тага – тоа е натприродно“, додаде таа.
Ова трауматично искуство ја насочило и кон филмот „Мали жени“ (1994), кој ѝ го посветила токму на Поли, чија омилена книга била токму овој класик.
Зошто ја плашела улогата во Stranger Things
Рајдер открива дека првично се двоумела да ја прифати улогата на Џојс, бидејќи темата – исчезнување на дете – била премногу блиску до нејзиното лично искуство.
„Stranger Things ме престраши, бидејќи сакав луѓето да сфатат колку е сериозна темата“.
Таа објасни дека голем дел од нејзината емоционална изведба во првата сезона била поврзана со разговорите што ги водела со таткото на Поли.
„Во првата сезона мораше да бидам толку емотивна што целото време бев скршена“, признава актерката.
Кога серијата станала глобален хит, чувствувала своевидно олеснување.
„Сфатив дека серијата веќе не е за мене – и тоа ми донесе мир“, вели Рајдер.
Заштитнички став кон младите колеги
Актерката се осврна и на младите ѕвезди на серијата, како Ноа Шнап и Мили Боби Браун, кои стекнаа светска слава уште како деца.
„Ги гледав како растат под огромно внимание што може да го преплави секого. Се чувствував заштитнички, бидејќи и јас тоа го поминав, но технологијата и социјалните мрежи го направија нивното искуство многу поинакво.“
