Постојаното консумирање чипс и други индустриски преработени грицки може сериозно да го наруши метаболизмот, да ги зголеми воспалителните процеси и да предизвика осцилации на шеќерот во крвта, предупредуваат кардиолози цитирани од Parade и Danas.rs.
Според д-р Џек Волфсон, чипсот и голем дел од денешните комерцијални грицки „не се вистинска храна“, туку производи полни со преработени масла, рафиниран скроб и хемиски ароми, без значајна нутритивна вредност.
Промени во метаболизмот, воспаленија и оптоварени артерии
Волфсон наведува дека честото јадење чипс може да доведе до забрзани скокови на шеќерот, хронични воспаленија и дополнително оптоварување на артериите.
„Вашите вкусови можеби го сакаат чипсот, но вашето срце не“, истакнува тој.
Кардиолозите потсетуваат дека срцето има потреба од минерали, антиоксиданси и здрави масти – нешта што ги нема во ваквите преработени ужини.
Чипсот има комбинација што е најштетна: нездрави масти, скроб и многу сол
Д-р Волфсон и д-р Коламбус Батист (Kaiser Permanente) појаснуваат дека проблемот кај чипсот е троен:
Нездрави масти: се пржи во индустриски растителни масла (пченкарно, соино, сончогледово) обработени на екстремни температури, што создава оксидирани масти кои ги иритираат крвните садови.
Рафиниран скроб: брзо се претвора во шеќер, предизвикува инсулински скокови, зголемување на триглицериди и таложење маснотии околу стомакот – фактори ризични за срцеви заболувања.
Преголем внес на натриум: една порција може да содржи седум проценти од дневната препорачана доза, а повеќето луѓе јадат многу повеќе од една порција.
Дополнително, чипсот содржи адитиви, засилувачи на вкус и синтетички ароми што го поттикнуваат прејадувањето.
Помфритот е уште поштетен
Според д-р Батист, помфритот е уште поопасен бидејќи содржи повеќе масти и поголеми количини на акриламид – соединение што се создава при термичка обработка на високи температури и е поврзано со оштетување на крвните садови.
Дали печениот чипс е поздрава опција?
Само делумно. Иако има помалку масти и акриламид, нутритивно и понатаму е сиромашен и богат со скроб и сол. „Има маргинална предност, но суштински останува преработена храна“, нагласува Батист.
Колку често може да се јаде чипс?
„Никој не вели дека треба целосно да го елиминирате“, вели Волфсон.
Но додава дека за луѓе со висок притисок, инсулинска резистенција, покачени триглицериди, прекумерна тежина или срцеви заболувања – чипсот треба да се јаде ретко, најмногу еднаш неделно или поретко, и во контролирана порција.
Паметни и здрави замени
Кардиолозите препорачуваат неколку подобри алтернативи:
свежо сечкано зеленчук со дип од маслиново масло или тахини,
печен сладок компир во малку маслиново или кокосово масло,
грст сурови јаткасти плодови (ореви, бадеми…).
„Овие намирници даваат здрави масти, минерали и антиоксиданси, ја задоволуваат желбата за грицки и го штитат срцето,“ заклучува Волфсон.
