Министерството за животна средина и просторно планирање информира дека е надминат прагот на алармирање за суспендирани честички PM10 на мерните места во Кичево и Струмица, согласно податоците од Државниот автоматски мониторинг систем за квалитет на амбиенталниот воздух и временската прогноза од Управата за хидрометеоролошки работи.
Како што соопштува Министерството, прагот на алармирање е надминат поради регистрирани концентрации над 150 микрограми на метар кубен во текот на два последователни дена.
„Прагот на алармирање на суспендирани честички со големина до 10 микрометри е надминат на мерните места Кичево и Струмица“, информираат од Министерството за животна средина и просторно планирање.
Според официјалните податоци, среднодневните концентрации на PM10 изнесувале 181,82 µg/m³ во Кичево и 153,11 µg/m³ во Струмица на 16 декември, додека на 17 декември се измерени 175,40 µg/m³ во Кичево и 156,99 µg/m³ во Струмица.
Од Министерството појаснуваат дека прагот на алармирање е утврден со Уредбата за гранични вредности за нивоа и видови на загадувачки супстанции во амбиенталниот воздух, објавена во „Службен весник на Република Македонија“ бр. 183 од 14 декември 2017 година.
Поради настанатата состојба, за Струмица се активираат конкретни мерки, меѓу кои интензивирање на вонредните инспекциски надзори на инсталациите со А и Б-интегрирани еколошки дозволи, зголемени контроли на техничката исправност на возилата, особено дизел возилата и нерегистрираните возила, засилени контроли на градилиштата, како и целосна забрана за горење на отворено.
Дополнително, од Министерството препорачуваат работодавците да ги ослободат од работни обврски бремените жени, лицата над 60 години и лицата со хронични заболувања, со препорака од матичен лекар, како и реорганизација на работното време за работниците кои работат на отворено, во периодот од 11 до 17 часот. Се препорачува и да не се организираат спортски и културни манифестации на отворено.
