Американската војска соопшти дека вчера извршила нов напад врз наводен брод за шверц на дрога во меѓународни води во источниот Пацифик, при што загинале четворица мажи, пренесе ДПА.
Јужната команда на САД (SOUTHCOM) на платформата X соопшти дека бродот „транзитирал по позната рута за трговија со дрога во Источниот Пацифик и бил вклучен во операции за трговија со дрога“.
Информациите не можеа независно да се потврдат, пренесе германската агенција.
Според SOUTHCOM, четворицата мажи биле убиени во „смртоносниот кинетички напад“. Војската објави кратко видео за кое, како што рече, го прикажува нападот, а снимки од воздух прво го покажуваат ударот, а потоа и бродот во пламен.
Од септември, американските сили постојано напаѓаат бродови во Карибите и источниот Пацифик за кои велат дека носат дрога, повикувајќи се на разузнавачки проценки. Војската јавно не доставила докази за да ги потврди тврдењата, потсетува ДПА.
Американските медиуми наведуваат дека досега во операциите се убиени повеќе од 90 лица. Американската администрација ги опиша убиените како шверцери на дрога и „терористи“, но нападите предизвикаа остри критики.
Експертите за човекови права на ОН изјавија дека операциите може да го прекршат меѓународното право, опишувајќи ги убиствата како незаконски вонсудски убиства, потсетува ДПА.
