Претседателот на СДСМ, Венко Филипче, остро ја критикуваше претседателката Гордана Сиљановска-Давкова, обвинувајќи ја дека со своите ставови и постапки ѝ дава поддршка на, како што рече, „најкорумпираната и криминална влада во историјата на државата“, која ја води Македонија во целосна политичка и економска изолација.
„Жалам што претседателката избрала да застане на страната на најкорумпираната и криминална влада во историјата на државата и во овој момент во Европа“, изјави Филипче на прес-конференција, реагирајќи на денешниот говор на Сиљановска-Давкова.
Според него, со поддршката што ја дава на актуелната власт, претседателката директно придонесува Македонија да се оддалечи од европскиот пат.
„Се потврдува тоа што го зборувавме изминатите недели и месеци – оваа влада, а денеска и претседателката, ја води Македонија кон изолација. Европската приказна за нас е завршена, нема да има никакви реформи и следи голема криза“, рече Филипче.
Тој изрази жалење што претседателката, како што нагласи, не застанала на страната на мнозинството граѓани кои сакаат целосна европска интеграција.
„Жалам што не застана на патот на вистинските реформи, туку поддржува квази реформи и делумно изменети закони кои оваа влада ги претставува како вистинска реформа, а тоа не е тоа“, изјави Филипче, предупредувајќи дека измените во правосудството ќе доведат до дополнителна партизација.
„Овие закони ќе овозможат поставување партиски обвинители и партиски судии, процес кој веќе е започнат, со цел да продолжат коруптивните пракси и крадењето на парите на граѓаните“, додаде тој.
Филипче најави и сериозни економски последици за граѓаните, посочувајќи дека следи период на поскапувања и финансиска несигурност.
„Следи голема криза. Ќе поскапи електричната енергија, а со тоа ќе поскапи сѐ. Нема договор за раст на платите, преговорите во Социјалниот совет не дадоа никаков резултат. Нема да има поголеми плати ниту за работниците, ниту во образованието, ниту во здравството“, рече Филипче.
Тој посочи дека нема да има поместување ниту во делот на социјалните трансфери и поддршката за најранливите категории граѓани.
„Имаме огромен проблем со буџетот, дупка од милијарда евра, која очигледно ќе се пополни со нови задолжувања следната година. Дел од нив се поврзани и со проектот ‘Мигранти за пари’, кој претседателката воопшто не го демантираше“, истакна Филипче.
Како дополнителен проблем, тој го наведе и губењето на европските средства за земјоделството.
„Поради коруптивните пракси се изгубени над 100 милиони евра од ИПАРД програмата. Европа го запира финансирањето на нашите земјоделци и огромен број семејства остануваат без финансиска поддршка“, рече претседателот на СДСМ.
На крајот, Филипче порача дека земјата се движи во погрешна насока.
„Енергетски кризи, изолација, целосно отсуство на структурни реформи и млади кои секој ден ја напуштаат земјата – тоа е резултатот од политиката што денес ја поддржува претседателката“, заклучи Филипче.
