СДСМ обвини дека поскапувањето на електричната енергија и прогласувањето кризна состојба се резултат на криминални тендери и неспособно управување со енергетскиот сектор, а не на надворешни фактори, како што се протестите во Грција. На прес-конференција, генералниот секретар на партијата, Александар Саша Димитријевиќ, оцени дека граѓаните плаќаат за лошите политики на Владата, додека буџетот се соочува со дупка од една милијарда евра.
„Наместо да ги покачи платите и пензиите, власта ги покачи сметките за струја и директно удри по стандардот на народот. Државата нема пари за плати и пензии, а дупката во буџетот изнесува една милијарда евра“, изјави Димитријевиќ.
Тој посочи дека за само година и половина, со министерката Сања Божиновска на чело на енергетиката, државната компанија ЕСМ била доведена до финансиски и производствен колапс. „Не се произведува доволно струја дома, туку се увезува скапа струја од странство. Оваа година имаме историски најниско производство на домашна електрична енергија – ниту половина од планираните 5.100 GWh“, рече тој.
Според СДСМ, разликата во цената меѓу домашното производство и увозот директно ги чини граѓаните десетици милиони евра. „Наместо струја произведена дома, која ја чини државата 80 до 90 евра по мегават-час, Владата купува струја по цена од 140 евра по мегават-час. Само во првите два квартали од 2025 година загубата изнесува 77 милиони евра, а проекцијата е дека до крајот на годината ќе надмине 100 милиони евра“, изјави Димитријевиќ.
Тој оцени дека токму овие загуби се причината за поскапувањето на струјата и за прогласувањето кризна состојба. „Сега е ли јасно зошто струјата поскапува и зошто се прогласува кризна состојба? За да се покријат криминални тендери и неспособност“, рече генералниот секретар на СДСМ.
Како дополнителен проблем, Димитријевиќ ги посочи и спорните јавни набавки. „Зошто фалат една милијарда евра во буџетот? Исто така поради тендери – 161 тендер за една фирма или девет милиони евра за друга фирма со само двајца вработени, за кои веќе објавивме“, изјави тој.
СДСМ побара итна реакција од Јавното обвинителство. „Бараме Обвинителството веднаш да отвори истрага за загубите од над 100 милиони евра и да утврди одговорност. Кој ќе одговара за овие загуби? Кој профитира од скапиот увоз на струја? Кој заработува додека народот плаќа?“, порача Димитријевиќ, нагласувајќи дека, според партијата, „одговорност мора да има“ и дека „работата не е завршена“.
