Емоционална атмосфера владееше на „Енфилд“ за време на натпреварот меѓу Ливерпул и Вулверхемптон (2:1), каде двата поранешни клуба на Диого Жота му оддадоа почит на фудбалерот кој загина во сообраќајна несреќа во јули, заедно со својот брат Андре Силва.
Двата сина на Жота, Диниш и Дуарте, заедно со уште двајца млади членови на семејството, беа дел од преднатпреварската церемонија и излегоа на теренот како маскоти, држејќи се за рака со капитенот на Ливерпул, Вирџил ван Дајк, и португалскиот голман на Вулвс, Жозе Са. Настанот од трибините го следеше и сопругата на Жота, Руте.
Тренерот на Ливерпул, Арне Слот, изјави дека моментите биле „тешки, но на некој начин и посебни“.
„Фудбалскиот свет покажа како треба да се однесува во вакви моменти. Нашите навивачи беа неверојатни од самиот почеток на трагедијата па сè до денес. Секој момент го одбележаа на начин каков што човек би посакал – во спомен на него“, изјави Слот.
Тој додаде дека почитта не дошла само од домашната публика.
„Денес и гостинските навивачи покажаа дека ова не е само за Ливерпул. Англиските навивачи се посебни и тоа го покажавме пред целиот свет“, рече Слот.
На теренот, и покрај подобрата игра во второто полувреме, Вулверхемптон го забележа 11-тиот последователен пораз и стана првиот клуб во историјата на Премиер лигата што не остварил ниту една победа во првите 18 натпревари од сезоната.
Тренерот на Вулвс, Роб Едвардс, призна дека ситуацијата е тешка.
„Ова е уште еден пораз и тоа боли. Им реков на играчите дека ми е навистина доста од ова, но ќе го анализирам натпреварот повторно, ќе се обидам да ја тргнам емоцијата настрана и да ги видам и позитивните работи. Во второто полувреме видов тим што беше храбар и покажа квалитет против еден од најдобрите“, изјави Едвардс.
Натпреварот, и покрај резултатот, ќе остане запаметен по достоинствената и човечка почит оддадена на Диого Жота – момент во кој фудбалот зборуваше погласно од резултатите.
Редакција Фронтлајн
