Основниот суд во Кавадарци изрече пресуда со која го осуди на доживотен затвор 43-годишниот С.И., откако тој во целост ја призна вината за кривичното дело убиство од користољубие, казниво по член 123 став 2 точка 4 од Кривичниот законик.
Пресудата беше донесена по поднесено обвинение од Основното јавно обвинителство Кавадарци, а судот ја изрече врз основа на признание на вина.
Според обвинението, на 27 јули годинава, обвинетиот од користољубие го лишил од живот својот помлад брат, Илија Иванов. Убиството се случило на роденденот на жртвата, кога меѓу двајцата браќа избила расправија. Обвинетиот верувал дека неговиот брат има намера да го преземе целиот семеен имот, по што, поттикнат од силен гнев и омраза, го нападнал со тапиот метален дел од тесла, удирајќи го по главата. Откако жртвата паднала, му задал уште два удари, нанесувајќи му повреди од кои починал на самото место.
По убиството, обвинетиот го напуштил домот, но следниот ден повторно се вратил, го пренел телото во бањата, а во наредните денови се обидувал да го прикрие делото. Ја чистел крвта од подот и од предметите, а телото подоцна го пренел во шупа, каде што го затрупал во ров и врз него поставил шперплоча и други предмети.
Во периодот од 30 јули до 5 август, кога телото било откриено, обвинетиот во повеќе наврати повлекувал пари користејќи ја банкарската картичка на жртвата.
Обвинението против С.И. било поднесено на 28 октомври, а обвинетиот во целост го признал начинот на извршување на кривичното дело, онака како што било наведено во обвинителниот акт.
При изрекувањето на пресудата, Судот донел и решение со кое на осудениот му ја продолжил мерката притвор до започнување на издржувањето на казната доживотен затвор.
