Сведок на смртоносниот пожар што избувна во преполниот бар во швајцарското скијалиште Кран-Монтана изјави дека луѓето биле во состојба на целосна паника, до степен што не биле ни свесни за сериозните изгореници на своите лица.
Деветнаесетгодишниот Оскар, кој сведочел за настанот, за новинарот на Sky News, Џејсон Фарел, изјавил дека кај дел од жртвите лицата биле „целосно уништени“ од пламенот. Тој раскажува дека се обидел да влезе во локалот непосредно пред да избувне пожарот, но просторот веќе тогаш бил преполн.
„Сцената беше како од хорор-филм“, вели Оскар. „Настана целосна паника. Многумина се обидуваа да излезат надвор. Луѓето удираа по прозорците и врескаа.“
Тој додава дека прозорците биле премногу дебели за да се скршат, а при обидите за излез луѓето паѓале еден врз друг, што дополнително ја влошило состојбата.
Видео кое циркулира и на социјалните мрежи покажува луѓе како панично бегаат од барот кој беше зафатен од пламен. Некои избегаа низ прозорци, додека излезот беше преполн со луѓе. Според досегашните информации, се чини дека објектот немал доволно излези за итни случаи за масата луѓе, од кои околу 200 биле во просторот во тој момент.
View this post on Instagram
„На некои лица им беа целосно изгорени – буквално уништени“, сведочи тој. „Луѓето ме прашуваа: ‘Дали сум изгорен? Дали ми е изгорено лицето?’“
Според него, адреналинот бил толку силен што многумина воопшто не чувствувале болка, и покрај тешките изгореници.
„Мислам дека поради адреналинот ништо не чувствуваа, иако беа тешко, сериозно изгорени“, изјавил Оскар.
Истрагата за причините за пожарот продолжува, а надлежните власти најавуваат дека ќе биде потребно време за целосно расветлување на трагедијата.
Несреќата се случила рано наутро за време на прославите на Нова Година. Пожарот избувнал околу 1:30 часот по локално време во барот „Le Constellation“, а причината засега не е позната, јавува Би-Би-Си.
Во изјава за медиумите, полицијата потврди дека експлозијата се случила додека барот ја славел Новата Година.
Бројот на жртви се искачи на најмалку 47, а повеќе од 110 се повредени, според швајцарскиот весник „Блик“, повикувајќи се на информации собрани на местото на настанот.
22 тешко повредени на возраст меѓу 16 и 26 години
Најмалку 22 лица кои беа сериозно повредени во пожарот се на возраст меѓу 16 и 26 години, покажуваат извештаите.
Според директорката на Универзитетската болница во Лозана, Клер Шарме, која разговараше со швајцарскиот дневен весник „24 Heures“, повредените биле префрлени со хеликоптер во болницата. Тоа е еден од само двата медицински центри во Швајцарија специјализирани за лекување на тешки изгореници, заедно со Универзитетската болница во Цирих.
Повеќето од жртвите имаат изгореници кои покриваат повеќе од 20 проценти од нивните тела, рече Шарме. Таа додаде дека нивното закрепнување ќе трае со недели, ако не и со месеци.
Ј. Ѓ.
