Здружението на новинарите на Македонија (ЗНМ) испрати барање за ургенција до Министерството за внатрешни работи за текот на постапката по поднесената пријава за координиран ботски напад врз Инстаграм профилите на медиумот „Слободен печат“.
Барањето е адресирано до националната фокална точка, Мухамед Исмаиљи, помошник на министерот во Одделот за односи со јавност и стратешки прашања при МВР, и следи по формалната пријава што ЗНМ ја поднесе на 15 ноември 2025 година до Секторот за компјутерски криминал и дигитална форензика.
Според ЗНМ, станува збор за координирана злоупотреба на социјалната мрежа Instagram, насочена кон попречување на работењето на медиумот и ограничување на видливоста на неговите содржини. При нападот биле регистрирани масовни сомнителни интеракции, вклучувајќи коментари, лајкови и follow-барања, како и драстичен пад на досегот на објавите, што упатува на основан сомнеж за алгоритамско ограничување на видливоста, познато како „shadow ban“.
Поради континуитетот на нападите, редакцијата на „Слободен печат“ била принудена дел од Инстаграм профилите привремено да ги заклучи со цел заштита од понатамошна злоупотреба.
Во изминатиот период, ЗНМ обезбедило институционална и правна поддршка за медиумот и ја информирало надлежната институција за продолжувањето на нападите и нивните последици врз новинарската работа. Со последното барање, од МВР се бара информација во која фаза се наоѓа истрагата, кои чекори се преземени, дали се вршат проверки за евентуална поврзаност на активностите со субјекти од Република Северна Македонија, како и дали е воспоставена комуникација со компанијата Meta / Instagram преку механизмите за меѓународна соработка.
Од ЗНМ потсетуваат дека координираните онлајн напади врз медиуми претставуваат сериозен ризик за слободата на изразување и форма на индиректен притисок врз новинарската работа, поради што е неопходна навремена и ефикасна институционална реакција.
Воедно, Здружението ги охрабрува новинарите и медиумските работници да ги пријавуваат сите закани, притисоци и напади, вклучително и онлајн напади, преку платформата SafeJournalists.net или директно до ЗНМ, со цел навремена заштита и јавно евидентирање на ваквите случаи.
