Опозициската СДСМ денеска соопшти дека актуелната влада, предводена од премиерот Христијан Мицкоски, наместо да ја води државата кон европска интеграција, ја турка Северна Македонија во политичка и меѓународна изолација.
„Актуелната влада на премиерот Мицкоски наместо кон интеграција земјата ја води во изолација“, се наведува во соопштението на СДСМ.
Од партијата посочуваат дека особено загрижува улогата на вицепремиерот Иван Стоилковиќ, кој, како што тврдат, има јасно изразени проруски ставови и врски со Москва.
„Најблизок соработник на Мицкоски и вицепремиер во неговата Влада е Иван Стоилковиќ, чии отворени проруски ставови и директни врски со Москва се сериозна закана за евроатланската ориентација на земјата“, наведуваат од СДСМ.
Како дополнителен аргумент, опозицијата ја посочува неговата неодамнешна појава на прославата на Денот на Република Српска, каде, според нив, бил во друштво на припадници на Ноќни волци, организација позната по поддршката на рускиот претседател Владимир Путин и ширење антизападни наративи.
„Пред само неколку дена, вицепремиерот Стоилковиќ присуствуваше на прослава заедно со „Ноќни волци“, познати по поддршката на Путин и ширењето анти-западни наративи“, се вели во реакцијата.
СДСМ смета дека контрадикторни се и јавните пораки на премиерот Мицкоски за стратешко партнерство со САД и ЕУ, наспроти неговите политички потези и релации во регионот.
„И самиот премиер Мицкоски, и покрај јавните изјави за стратешка соработка со САД и ЕУ интеграција, со своите постапки и блиски врски со Вучиќ и СНС прави сѐ спротивно, водејќи ја Македонија кон изолација“, наведуваат од партијата, алудирајќи на српскиот претседател Александар Вучиќ и владејачката партија во Србија.
Во соопштението се тврди дека реформите поврзани со европската агенда намерно се одолговлекуваат, а конфликтите со соседите свесно се продлабочуваат.
„Реформите за ЕУ намерно се избегнуваат, намерно се создаваат конфликти со соседите и се измислуваат причини за да се блокираат преговорите. Сѐ е смислено сценарио, дел од една анти-ЕУ кампања“, порачуваат од СДСМ.
Партијата се повикува и на податоци од истражувања на јавното мислење, според кои мнозинството граѓани ја поддржуваат евроатланската ориентација на државата.
„Според најновите истражувања од 2025 година, дури 70 проценти од граѓаните поддржуваат членство во ЕУ, а 77 проценти го гледаат членството во НАТО како позитивно“, наведуваат од СДСМ.
Од таму заклучуваат дека актуелните политики на Владата се спротивни на волјата на граѓаните и ја водат државата кон економска и политичка маргинализација.
