Во Клубот на пратениците денеска ќе се одржи лидерска средба свикана од премиерот и претседател на ВМРО-ДПМНЕ, Христијан Мицкоски, со претседателите на парламентарните партии кои имаат пратенички групи во Собранието.
Како што е најавено, на средбата ќе се разговара за реформските закони во правосудството, изборот на народен правобранител, измените на Изборниот законик, можноста за укинување на техничката влада, како и за други прашања предложени од учесниците.
Од опозициските пратенички групи, засега учество потврдија лидерите на Левица и ДУИ, Димитар Апасиев и Али Ахмети. Претседателот на СДСМ, Венко Филипче, уште веднаш го одби повикот на Мицкоски.
Од коалициските партнери во Владата, на средбата се очекува да присуствуваат претседателот на ЗНАМ и градоначалник на Куманово, Максим Димитриевски, како и претставник од коалицијата „Вреди“, Биљал Касами. Лидерската средба ја поздравија и ЛДП и ДОМ.
СДСМ: Средбата го легитимира криминалот и корупцијата
Во соопштение до јавноста, СДСМ остро реагираше на најавената средба, оценувајќи дека секој што ќе учествува на разговорите за укинување на техничката влада станува соучесник во легитимирање на криминалот и корупцијата на тендер коалицијата ВМРО-ЗНАМ, спроведување на анти-ЕУ кампања за изолација на земјата, план за предвремени избори без основни услови за фер и демократски процес и реализација на планот „мигранти за пари“.
„Сите чекори што власта досега ги презема веќе ги најавивме – изолација, избори, мигранти за пари. Секој што ќе отиде на средбата со Мицкоски не може подоцна да каже дека не бил соучесник“, се наведува во соопштението.
Од СДСМ додаваат дека партијата останува со граѓаните и, како што истакнуваат, на вистинската страна – на страната на Македонија, на страната на интеграцијата, на фронтот за правда и против корупцијата и криминалот.
