Одлуката на Соединетите Американски Држави да ја суспендираат обработката на визи за македонските граѓани не е техничка пауза, туку јасен политички сигнал и предупредување за состојбите во земјата, оцени денеска Андреј Жерновски, член на Извршниот одбор на СДСМ, на прес-конференција.
„Видовме 24-часовен молк на премиерот Мицкоски, кој цел ден го немаше од политичката сцена. Денеска го очекуваме да се појави. Тоа не е случајно – требаше да даде одговор зошто САД ја ставија Македонија на оваа листа“, изјави Жерновски.
Тој додаде дека одговорот требало да го даде токму премиерот Христијан Мицкоски, кој, како што рече, со години уверувал колку се блиски односите со САД.
„Ако некој може да даде одговор, тоа е сигурно ‘другарот од периметарот’, премиерот кој две години нè убедува колку блиски пријатели сме. Наместо него, за уши го извади министерот за надворешни работи, Муцунски“, рече Жерновски.
Според него, настапот на министерот бил уште една сериозна грешка.
„Се случи уште еден трагикомичен настап на политичар кој многу зборува, а ништо не кажува – персонификација на денешната киндер-дипломатија“, изјави Жерновски.
Во своето обраќање, тој направи споредба со поранешните влади на ВМРО-ДПМНЕ.
„Мицкоски фактички го надмина својот претходник Груевски. Ако Груевски заврши на црната листа, Мицкоски, за жал, ја стави целата држава на црна листа“, рече тој.
Жерновски потенцираше дека американската одлука е сериозен дипломатски сигнал.
„Ова не е техничка пауза, како што тврди Муцунски. Ова е политички сигнал и предупредување. САД внимателно ја следат состојбата во земјата и јасно порачуваат дека гледаат проблем, дека нешто не е во ред“, нагласи тој.
Тој оцени дека, како што рече, „митот за периметарот на Мицкоски пропаднал“.
„Неговите ‘одлични, специјални односи’ со САД се толку добри што завршивме во периметарот на Сомалија, како ‘трет свет’“, изјави Жерновски.
Според СДСМ, Македонија ја плаќа цената на погрешните политики на актуелната власт.
„Македонија ја плаќа цената на политиките на Мицкоски кои водат кон затворање и изолација на земјата. Тоа ја зголемува недовербата на граѓаните во институциите. Недостигот од економска перспектива ги тера младите да заминуваат, затоа што не гледаат иднина дома“, рече тој.
Жерновски наведе дека пораките од САД се јасни.
„САД испраќаат порака дека не се задоволни од капацитетот на државата, дека постои недоверба во институциите – во безбедноста и документацијата – и дека очекуваат реформи кои не се спроведуваат“, изјави тој.
Тој обвини дека владејачката коалиција води политики на изолација.
„СДСМ подолго време укажува дека политиките на изолација на тендер-коалицијата ВМРО-ЗНАМ го загрозуваат стратешкото партнерство со САД и процесот на интеграција во ЕУ“, рече Жерновски.
Како особено проблематична ја оцени и надворешната политика на владата.
„Надворешната политика се сведува на активностите на најблискиот соработник на Мицкоски, Иван Стоилковиќ, со ‘Ноќните волци’ блиски до Путин. Паралелно, сведоци сме на активна анти-ЕУ кампања и напади врз Соединетите Американски Држави од поранешни дипломати и сателит-партии“, изјави тој.
На крајот, Жерновски порача дека мерката на САД е сериозно предупредување.
„Ова е дипломатски сигнал, политички аларм и индикатор каде реално се наоѓа државата на меѓународната мапа. Ова се први чекори – САД носат и Закон за Западен Балкан насочен директно кон борбата против криминалот и корупцијата“, рече Жерновски, додавајќи дека СДСМ ќе продолжи, како што рече, „јасно и гласно да ја разоткрива опасната агенда на власта и да се бори против политиките на изолација и загрозување на стратешкото партнерство со САД“.
