Американскиот претседател Доналд Трамп најави бран зголемувања на царините за европските сојузници, кои ќе останат на сила сè додека на Соединетите Американски Држави не им биде дозволено да го купат Гренланд.
Во објава на својата социјална мрежа, Трамп соопшти дека царините од 10 проценти ќе стапат на сила на 1 февруари за Данска, Норвешка, Шведска, Франција, Германија, Велика Британија, Холандија и Финска. Според најавата, од 1 јуни тие ќе бидат зголемени на 25 проценти и ќе продолжат да се применуваат сè додека не се постигне договор за американска купопродажба на Гренланд.
Трамп обвини повеќе европски земји дека играат, како што рече, „многу опасна игра“ на Гренланд, тврдејќи дека „светскиот мир е во прашање“. Во својата објава тој наведе дека Данска, Норвешка, Шведска, Франција, Германија, Обединетото Кралство, Холандија и Финска заминале на Гренланд со, како што напиша, нејасна цел и дека со тоа презеле неприфатлив ризик.
По најавата на Трамп, следуваа остри реакции од земјите на кои им се закани со царини.
Европските лидери порачаа дека нема да дозволат да бидат заплашени и најавија заеднички одговор
Како што пренесуваат дипломатски извори, амбасадорите на земјите членки на Европската унија се повикани на итен состанок во Брисел. Според информации од три дипломатски извори, разговорите треба да се одржат утре, со цел да се усогласи заеднички европски став.
Францускиот претседател Емануел Макрон изјави дека Франција останува цврсто посветена на суверенитетот и независноста на државите, продолжувајќи да им дава поддршка на Гренланд и Данска.
– Ниту застрашувањето, ниту заканите нема да влијаат врз нас, напиша Макрон на социјалните мрежи, оценувајќи ги најавите за царини како неприфатливи. Тој порача дека доколку мерките се потврдат, Европа ќе одговори обединето и координирано, со цел да се заштити европскиот суверенитет.
France is committed to the sovereignty and independence of nations, in Europe and elsewhere. This guides our choices. It underpins our commitment to the United Nations and to its Charter.
It is on this basis that we support, and will continue to support Ukraine…
— Emmanuel Macron (@EmmanuelMacron) January 17, 2026
Шведскиот премиер Улф Кристерсон исто така ги отфрли заканите со царини, нагласувајќи дека неговата земја нема да дозволи уцени. Тој истакна дека само Данска и Гренланд имаат право да одлучуваат за прашањата што се однесуваат на нив, додавајќи дека Шведска веќе води интензивни разговори со други земји од Европската унија, како и со Норвешка и Велика Британија, со цел да се постигне заеднички одговор.
Vi låter oss inte utpressas. Bara Danmark och Grönland bestämmer i frågor som rör Danmark och Grönland. Jag kommer alltid stå upp för mitt land, och för våra allierade grannar. Detta är en EU-fråga som rör många fler länder än de som nu pekas ut. Sverige har nu intensiva…
— Ulf Kristersson (@SwedishPM) January 17, 2026
Британскиот премиер Сер Кир Стармер оцени дека заканите за воведување царини кон сојузниците на САД се целосно погрешни. Според него, позицијата на Лондон е јасна – Гренланд е дел од Кралството Данска, а за неговата иднина одлучуваат Гренланѓаните и Данците. Стармер нагласи и дека безбедноста на Арктикот е од значење за целата НАТО алијанса и дека воведувањето царини кон сојузниците ја поткопува колективната безбедност.
Претседателката на Европската комисија, Урсула фон дер Лајен, порача дека територијалниот интегритет и суверенитетот се основни принципи на меѓународното право. Таа предупреди дека воведувањето царини би ги нарушило трансатлантските односи и би носело ризик од опасна ескалација, но нагласи дека Европа ќе остане обединета, координирана и посветена на заштитата на сопствениот суверенитет.
Territorial integrity and sovereignty are fundamental principles of international law.
They are essential for Europe and for the international community as a whole.
We have consistently underlined our shared transatlantic interest in peace and security in the Arctic, including…
— Ursula von der Leyen (@vonderleyen) January 17, 2026
Трамп најави дека царините од 10 отсто ќе стапат на сила на 1 февруари за Данска, Норвешка, Шведска, Франција, Германија, Велика Британија, Холандија и Финска, а од 1 јуни ќе бидат зголемени на 25 отсто.
Редакција Фронтлајн
