Од СДСМ порачаа дека зголемувањето на платите не смее да се одложува и дека работниците не можат да чекаат до 2028 година за подобар животен стандард.
„На работниците не им требаат изговори, ниту најави за две години. На работниците платите треба да им се покачат сега, оваа година, затоа што парите не им стигаат од први до први“, соопштија од СДСМ.
Во реакцијата се поставува и прашање до премиерот Христијан Мицкоски: „Дали Мицкоски чекаше две години за да купи часовници од 65.000 евра?“.
Според партијата, последните официјални податоци покажуваат дека минималните месечни трошоци на едно четиричлено семејство во јануари 2026 година изнесувале 66.413 денари, што значи дека ниту две минимални плати не се доволни за покривање на основните потреби.
„Сегашното ниво од 400 евра минимална плата не обезбедува доволна заштита на животниот стандард и не ја следи реалната структура на трошоците на едно просечно домаќинство“, се наведува во соопштението.
Од СДСМ предупредуваат дека работниците „буквално се борат за парче леб“ и дека одложувањето на зголемувањето на платите има сериозни последици.
„Македонија денес има најниска минимална плата во регионот и во Европа. Ако Мицкоски се фали дека сме четврта економија во Европа, зошто тогаш не сме на четврто место по висината на платите?“, прашуваат од партијата.
Во споредба со регионот, од СДСМ посочуваат дека во Косово минималната плата се зголемува од 350 на 500 евра во две фази, во Албанија од 1 јануари 2026 ќе изнесува 500 евра, во Србија е зголемена на 500 евра, а во Црна Гора се движи од 600 до 800 евра.
„Последиците веќе се гледаат – квалификуваните работници масовно заминуваат во странство, младите се иселуваат, а кај нас се увезуваат таканаречени ‘економски работници’. Освен ако целта на владата не е токму тоа – со увоз на работна сила да се намали вредноста на трудот“, се наведува во соопштението на СДСМ.
