Британскиот актер Ијан Мекелен официјално потврди дека повторно ќе ја толкува улогата на волшебникот Гандалф во новиот филм од универзумот на Господарот на прстените.
Мекелен ја потврди својата улога во претстојниот филм со работен наслов The Lord of the Rings: The Hunt for Gollum, кој ќе ја обработува приказната за потрагата по Голум во периодот пред настаните од „Заедништвото на прстенот“. Филмот ќе го режира Енди Серкис, кој повторно ќе се појави и во улогата на Голум.
Во изјава за американски медиуми, Мекелен со препознатлив хумор изјави дека повторно ќе ја облече „шапката, брадата и стапот“ на Гандалф, додавајќи дека секогаш е радост да се врати во Средниот свет.
Снимањето на филмот се очекува да започне ова лето во Нов Зеланд, а премиерата е најавена за 2027 година. Проектот се реализира со поддршка на Warner Bros. и претставува нов чекор во проширувањето на филмската сага на Толкин.
Мекелен претходно ја толкуваше улогата на Гандалф во оригиналната трилогија на Питер Џексон, како и во филмовите „Хобит“, со што ликот стана еден од најпрепознатливите и најсакани во историјата на фантастичниот филм.
Редакција Фронтлајн
