Влијанието на ерата на „слопагандата“ на Трамп, во Северна Македонија се забележува преку објавите на дел од локалните (трампистички) медиуми, инфлуенсери и профили на социјални мрежи, кои ги пренесуваат и ре-споделуваат ваквите манипулативни слики и мемиња генетирани со вештачка интелигенција.
На пример, контроверзната ВИ-слика од т.н. „Трамп како папа“, која првично кружеше на американски канали, беше преземена од одредени македонски сајтови со сензационалистички наслови во кои не е јасно означено дека е генерирана содржина, што ја отвори вратата за широка дистрибуција без критичка проверка.
Таквите практики имаат пошироко влијание врз јавниот дискурс во Северна Македонија, токму затоа што доведуваат до:
Ерозија на довербата во медиуми: Кога официјални институции користат неверодостојни визуелни пораки како „меме“ без јасно информирање за нивната фиктивна природа, тоа ја разредува општата доверба во медиумскиот екосистем и поттикнува скепса дури и кон веродостојни информации. Оваа динамика ја пренесуваат и локалните профили што ре-постираат такви слики, зајакнувајќи ја дезинформациската култура.
Поларизација на јавноста: Мемињата што „слопагандата“ ги произведува се дизајнирани да ја зацврстат групната идентификација и да ги мобилизираат поддржувачите, наместо да ја поттикнуваат критичката дебата. Кога тие исти објави се шири преку македонски профили, тие не само што го реплицираат ефектот туку и го оправдуваат некритичкиот или поларизиран дискурс кај делови од публиката што сакаат да ги поддржат пораките од „МАГА“ или слични идеолошки движења.
Намалување на медиумската писменост: Кога јавноста во Северна Македонија гледа или споделува вакви AI-генерирани мемиња како „доказ“ или „импактна порака“, без да бидат означени како измислени или дезинформации, тоа го поткопува критичкото мислење и ја олеснува распространетата појава на непроверени наративи. Истражувањата за AI-мемети покажуваат дека нивниот ефект не зависи од нивната реалност, туку од тоа колку брзо и широко се споделуваат — феномен што се реплицира и во македонскиот медиумски простор.
Конечно, појавата на слопагандата од официјалните комуникациски канали на САД не е само американски феномен — таа брзо преминува граници преку дигиталните мрежи, придонесувајќи за ширење дезинформации, поларизација и намалена доверба во фактичкиот наратив, вклучително и во Северна Македонија. Ова упатува на потребата од поголема медиумска писменост, критичка процена на содржината што се споделува и јасни ознаки за AI-генерирана содржина како дел од глобалниот напор да се сопре инфо-хаосот кој влијае на создавање искривена перцепција за случувањата во светот и изведување погрешни заклучоци, особено во земја каде што на големо функционираат канали кои шират дезинформации, малициозна странска пропаганда, и е мета на хибридни операции.
Можеби токму влијанието на слопагандата придонесес Северна Македонија да се најде меѓу ретките земји во кои американскиот претседател Доналд Трамп има позитивен рејтинг. Иако, нето резултатот е скромни +2%, податоците на меѓународна анкета на Галуп Интернационал, спроведена меѓу 64.000 испитаници во 61 земја, во периодот октомври–декември 2025 година, откриваат силна поларизација: 48% позитивно, 46% негативно мислење. Ова е првпат Трамп да има позитивен нето рејтинг во Македонија. Според ДВ, претходните години неговиот рејтинг бил –4% во 2017 година, рекордно низок –25% во 2018 и повторно –4% во 2019.
Текстот е дел од анализата на Драган Мишев „Ерата на слопагандата под Трамп: Дипфејк објавите на Белата куќа и нивнoто влијание во Северна Македонија, “ објавена на ЦИВИЛ Медиа на 9 февруари 2026 година.
Извор: Цивил Медиа
