На 3 април, на сцената на Македонски народен театар ќе гостува Драмата при Словенечко народно гледалиште Марибор (СНГ) со наградуваната монодрама „Immaculata“ („Безгрешна“), сценско остварување инспирирано од романот Маријиниот завет на Колм Тојбин. Претставата е создадена како омаж на прерано починатиот режисер Томаж Пандур.
Гостувањето е дел од роденденската програма со која МНТ продолжува да го одбележува својот јубилеј – 81 година од постоењето.
„Immaculata“ ја раскажува приказната за Марија, востоличена како Мајка Божја, но во оваа сценска адаптација прикажана во поинтимна и покондензирана форма. Преку исповед што ги мапира нејзините внатрешни пејзажи, Марија ја раскажува својата вистина за настаните што го промениле светот, доведувајќи ги во прашање големите идеи за верата, жртвата и божественото.
Претставата ја истражува тензијата меѓу догмата и човечноста, прикажувајќи ја Марија како жена од месо и крв, избришана од историјата и злоупотребена од религиозните интерпретации, но и како фигура што преку тишината и сомнежот отвора длабоки прашања за загубата и болката.
Во улогата на Марија настапува Наташа Матјашец Рошкер, која за оваа изведба ја доби наградата за најдобра актерка на фестивалот „Мителфест“ во Чедад, Италија, во 2021 година. Драматизацијата и адаптацијата се потпишани од Ливија Пандур и Томаж Пандур.
„Страсно верувам во моќта на театарот и сите мои дела се архетипови на ритуал“, велеше Томаж Пандур, режисер чиј опус остави длабока трага во словенечкиот и европскиот театар. Од „Шехерезада“ до „Фауст“, неговата работа се карактеризираше со истражување на односите меѓу човечкото и божественото, времето и бесконечноста, реалноста и митот.
Ливија Пандур „Immaculata“ ја доживува како личен и театарски чин посветен на неговото наследство. „Ако олтарот е таму каде што клечиме, тогаш мојот олтар е сцената“, вели таа.
Претставата има реализирано бројни меѓународни настапи, меѓу кои во Театро Еспањол во Мадрид, Конхунто де Артес Есценикaс во Гвадалахара, фестивалот „Мителфест“ во Италија, фестивалот СОЛО во Москва и 10. Театарска олимпијада во Будимпешта.
Гостувањето во МНТ е дел од роденденската програма на театарот, кој традиционално ја одбележува годишнината од првата изведена претстава на 3 април 1945 година.
Билетите за „Immaculata“ се веќе во продажба онлајн и на билетарницата во МНТ.
