Соединетите Американски Држави и Република Северна Македонија постигнаа договор за рамка за „реципрочна, фер и балансирана трговија“, со цел да се зајакнат билатералните економски односи и да се прошири пристапот на извозниците од двете земји до меѓусебните пазари, се наведува во официјалното соопштение на Белата куќа.
„Соединетите Американски Држави и Република Северна Македонија се согласија за рамка за договор за реципрочна, фер и балансирана трговија, кој ќе ги зајакне нашите билатерални економски односи и ќе им обезбеди на извозниците од двете земји проширен пристап до меѓусебните пазари“, се наведува во соопштението.
Според Белата куќа, договорот има за цел да ја продлабочи трансатлантската соработка, да го поттикне економскиот раст и да ги зајакне заедничките стратешки интереси.
„Договорот ќе ја зајакне нашата трговска врска, ќе ги поддржи заедничките стратешки интереси, ќе промовира економски раст и ќе го продлабочи нашето трансатлантско партнерство“, се наведува во документот.
Северна Македонија ќе ги укине царините за американски производи
Една од најзначајните обврски преземени со рамката е одлуката Северна Македонија да ги укине царините за американски индустриски и земјоделски производи.
„Северна Македонија ќе ги елиминира царинските давачки за сите американски индустриски и земјоделски производи што се извезуваат во Северна Македонија“, се наведува во соопштението.
Во исто време, САД ќе ја задржат постојната стапка на реципрочни царини од 15 проценти за македонски производи, но ќе овозможат одредени производи да добијат нулта царинска стапка.
„Соединетите Држави ќе ја задржат реципрочната царинска стапка од 15 проценти за производи од Северна Македонија, но ќе идентификуваат производи што ќе добијат нулта реципрочна царинска стапка“, се наведува во документот.
Во соопштението се додава дека двете земји можат да разгледаат дополнителни измени на царинските стапки по финализирањето на договорот.
Фокус на енергијата и увоз на американски течен гас
Белата куќа посочува дека договорот ќе отвори нови можности и во енергетскиот сектор, особено со изградбата на новиот гасен интерконектор меѓу Северна Македонија и Грција.
„Соединетите Држави и Северна Македонија ја истакнуваат изградбата на важен нов гасен интерконектор меѓу Северна Македонија и Грција, кој ќе овозможи подобрување на енергетската безбедност и диверзификација на енергетските извори, вклучително и преку купување американски течен природен гас“, се наведува во соопштението.
Се додава дека Северна Македонија ќе започне со купување американски течен гас (LNG) по завршувањето на овој интерконектор.
Зајакнување на економската и безбедносната соработка
Договорот предвидува и засилена соработка во повеќе области, вклучително и безбедноста на синџирите на снабдување, инвестициите и контролата на извозот.
„Двете земји се обврзаа да ја зајакнат економската и националната безбедносна соработка со цел подобрување на отпорноста на синџирите на снабдување и иновациите, како и борба против избегнување на царини и соработка во контрола на инвестиции и извоз“, се наведува во соопштението.
Дополнително, двете страни ќе работат на отстранување на нетарифни бариери, ќе водат консултации за земјоделските производи и ќе разговараат за прашања поврзани со интелектуалната сопственост, трудот и дигиталната економија.
Во соопштението се наведува и дека Северна Македонија се обврзала да не воведува данок на дигитални услуги и да поддржи глобален мораториум на царини за електронски преноси во рамките на Светската трговска организација.
Следуваат формални процедури пред потпишување
Белата куќа информира дека договорот сè уште не е финализиран и дека следуваат дополнителни чекори пред неговото официјално потпишување и стапување во сила.
Мицкоски: Продлабочување на стратешко партнерство со САД: силна поддршка и нови економски перспективи за Македонија
Премиерот Христијан Мицкоски оцени дека заедничката изјава меѓу Соединетите Американски Држави и Македонија за реципрочна трговија претставува значаен чекор кон продлабочување на стратешкото партнерство и отвора нови економски перспективи за државата.
„Продлабочување на стратешко партнерство со САД: силна поддршка и нови економски перспективи за Македонија“, наведе Мицкоски во својата изјава, осврнувајќи се на документот објавен од Белата куќа.
Тој посочи дека ова следува по повеќе значајни дипломатски и институционални чекори.
„По договорот за партнерство со Обединетото Кралство и затворањето на постмониторинг дијалогот со Советот на Европа по цели 26 години, доцна синоќа Белата куќа објави Заедничка изјава меѓу САД и Македонија за реципрочна трговија“, изјави премиерот.
Според него, оваа изјава е потврда за поддршката што Македонија ја добива од САД и поставува основа за поширок економски договор.
„Оваа изјава претставува јасен сигнал за продлабочување на стратешкото партнерство и потврда за силната поддршка што Македонија ја ужива од САД. Таа го трасира патот кон сеопфатен договор кој ќе обезбеди тарифи не повисоки од 15%, а за одредени производи и индустрии и до 0%, отворајќи нови можности за извоз, инвестиции и економски раст“, нагласи Мицкоски.
Премиерот оцени дека ваквите чекори ја зајакнуваат позицијата на државата на меѓународната сцена.
„Со ваквите чекори ја зацврстуваме позицијата на Македонија како доверлив и предвидлив партнер, градиме економија со повисок стандард и ја унапредуваме нашата меѓународна позиција“, изјави тој.
Во заклучок, Мицкоски порача дека Владата останува фокусирана на конкретни резултати и соработка со меѓународните партнери.
„Ова е политика на конкретни резултати. Чекор по чекор, со јасна визија и стабилна поддршка од нашите стратешки сојузници“, изјави премиерот Христијан Мицкоски.
Ј. Ѓ.
