Полициски службеници од СВР Скопје лишиле од слобода 55-годишен жител на Скопје поради сомнение дека со пиштол се заканувал на својата сопруга и ќерки и физички нападнал една од нив, соопшти Министерството за внатрешни работи.
Според информациите од МВР, на 06 март 2026 година во 00:40 часот, на подрачјето на Кисела Вода, полициски службеници го привеле Б.С. (55) од Скопје. Тој се сомничи дека од пиштол пукал кон неговата 48-годишна сопруга, се заканувал на нивните три ќерки на возраст од 26, 24 и 18 години, а физички ја нападнал 24-годишната ќерка.
Според пријавеното, инцидентот започнал на 1 март 2026 година, по претходна расправија во семејниот дом. Во текот на расправијата, Б.С. испукал еден куршум од пиштол, при што куршумот завршил во прозорецот од домот.
Потоа отишол кај 24-годишната и 18-годишната ќерка, им се заканувал и физички ја нападнал 24-годишната ќерка.
Како што е пријавено, насилното однесување било повторено и на 5 март околу 22:30 часот, кога осомничениот повторно со пиштол се заканувал на сопругата. Во тој момент бил спречен од ќерките да го употреби оружјето.
Од МВР информираат дека Б.С. е задржан во полициска станица, а по целосно документирање на случајот против него ќе биде поднесена соодветна пријава.
